Апазіцыянера асудзілі за тое, што ён даў некалькі незалежных газетаў свайму суседу

У Астравецкім судзе грамадскага актывіста Івана Крука асудзілі на 700 тысячаў рублёў з фармулёўкай «распаўсюд друкаваных выданняў без выходных звестак».

Нагадаем, што 26 красавіка Іван Крук сустрэў на вуліцы Астраўца пенсіянера, жыхара суседняга дома, і даў яму друкаваныя выданні, дзе апублікаваныя артыкулы пра планаванае будаўніцтва АЭС у Астравецкім раёне. Гэта газеты «Глыток паветра», «Новы час», бюлетэні «Астравецкі веснік», «Мірны атам», «Вилейшчына» (усё па адным асобніку). Пасля таго, як Іван Крук сышоў, да пенсіянера падышлі супрацоўнікі міліцыі і дзяржбяспекі. Усе выданні, акрамя газеты «Новы час», яны забралі.

У Івана Крука і пенсіянера ўчастковы ўзяў пісьмовыя тлумачэнні. Разам з друкаванымі выданнямі яны былі адпраўленыя ў Міністэрства інфармацыі.

Начальнік прававога ўпраўлення Міністэрства інфармацыі Лілія Богдан 12 чэрвеня склала ў дачыненні да актывіста пратакол аб адміністрацыйным правапарушэнні. У ім пазначана, што Іван Крук парушыў арт. 22 Закона «Аб сродках масавай інфармацыі», а таксама патрабаванні Міждзяржаўнага стандарту ДАСТа 7.5-95 у частцы ўказання выходных звестак. У прыватнасці, кажацца ў пратаколе, у выданнях не пазначаны заснавальнік, рэдактар, адрас рэдакцыі.

У мінулую пятніцу Іван Крук у чарговы раз уносіў хадайніцтвы. Першае - каб працэс спынілі з-за таго, што ў яго дзеяннях няма хоць якіх-небудзь прыкметаў парушэння закона.

Іван Крук даказваў суду, што ўсяго толькі даў пачытаць некалькі газетаў свайму суседу, а не займаўся распаўсюдам друкаваных выданняў без выходных звестак. Суд хадайніцтва адхіліў.

Пасля гэтага астравецкі актывіст, паводле яго словаў, хадаўнічаў аб недаверы да суддзі, але і гэтае хадайніцтва было адхіленае. У пятніцу ў судзе паўторна дапыталі ўчастковага міліцыянта, які ў чацвер блытаўся ў сваіх паказаннях.

За працэсам у залі назіраў актывіст апазіцыі Мікалай Уласевіч. Вось яго ўражанні ад працэса:

«Па-сутнасці, уся справа развалілася на вачах. Іван Крук прызнаў, што даваў газеты суседу - але што з гэтага? У іх не было больш ніякіх фактаў. І яны яшчэ раз дапыталі міліцыянта, які ў чацвер блытаўся ў судзе, каб у пятніцу правільна запісаць яго паказанні».

Іван Крук неаднаразова заяўляў, што ўлады парушаюць яго канстытуцыйныя правы на свабоду атрымання і перадачы інфармацыі. У пятніцу пасля заканчення судовага паседжання Крук заявіў:

«Я кажу проста ў кабінеце суддзі: яны хочуць, каб людзям не даходзіла інфармацыя. Міністэрства інфармацыі адправіла мяне ў суд, а суд апынуўся паміж двух агнёў».

Кіраўнік цэнтра прававой дапамогі СМІ пры Беларускай асацыяцыі журналістаў (БАЖ), Міхаіл Пастухоў, каментуючы судовую справу, заўважыў, што гэта ўжо не першы падобны выпадак. Раней быў асуджаны Сяргей Панамарэнка за выпуск незарэгістраванага выдання тыражом у 299 асобнікаў. Суд палічыў, што такое рашэнне адпавядае дзейснаму закону «Аб друку і СМІ». Гэтыя выпадкі сведчаць пра тое, што ў краіне пачалася ўсеагульная кампанія па пераследзе малатыражных СМІ.

«Тым не менш ў новым дзейсным законе дапускаецца магчымасць выхаду ў свет газетаў тыражом да 300 асобнікаў без дзяржаўнай рэгістрацыі і стварэння юрыдычнай асобы», -- заўважае Міхаіл Пастухоў.