Гассуд пазбавіў «Рух наперад» юрыдычнага адрасу

Гаспадарчы суд Менска 29 ліпеня задаволіў пазоў Менгарвыканкама ў дачыненні да даследча-асветніцкай установы «Рух наперад».

Суд прызнаў дамову арэнды памяшкання ўстановы «Рух наперад» у ТАА «Ціна Ўлаці» «нязначнай», што фактычна дае юрыдычную аснову для ліквідацыі «Руху наперад», які праводзіць кампанію «Гавары праўду!».

Пра гэта паведаміла БелаПАН праваабаронца Раіса Міхайлоўская.

«Першапачаткова гарвыканкам прасіў прызнаць несапраўднай дамову арэнды, аднак у судзе палажэнні пазову змяніліся. Калі б дамова арэнды была прызнаная судом несапраўднай, «Рух наперад» пазбавіўся б юрыдычнага адрасу пасля ўступлення рашэння ў сілу. Сённяшняе рашэнне суда азначае, што з самага пачатку сваёй дзейнасці праца ўстановы была неправамоцнай, бо яна не мела юрыдычнага адрасу і не магла быць зарэгістраваная», — сказала Міхайлоўская.

Рашэнне суда прадстаўнікі «Руху наперад» маюць намер абскардзіць у Вышэйшым гаспадарчым судзе.

Праваабаронца лічыць, што падчас судовага працэсу не выконваліся нормы Грамадзянскага кодэкса.