Лукашэнка патрабуе адмовіцца ад імпарту «мармуровага» мяса

Дыктатар, мабыць, супакоіцца толькі пасля поўнай адмовы Беларусі ад харчовага імпарту.

«Мы павінны ў сябе вырабляць усё тое, што можам, каб адысці ад імпарту. Мы гэта пачалі рабіць, пачынаючы ад крупы і заканчваючы мармуровым мясам, і па іншых напрамках», - заявіў сёння Лукашэнка, піша АФН.

«...Каб не вывозіць грошы за межы краіны, закупляючы па імпарту прадукты харчавання», - растлумачыў ён.

Нагадаем, яшчэ ў красавіку Лукашэнка даручыў міністру сельскай гаспадаркі і харчавання наладзіць ў рэспубліцы вытворчасць «мармуровага» мяса.

Беларускі кіраўнік распавёў, што Беларусь хутка купіць спецыяльнае абсталяванне для гэтага. «Цяпер мы купляем лінію. Гэта нядорага для дзяржавы. Усё па еўрапейскіх стандартах спакуем і будзем прадаваць. Сёння велізарны попыт на такую прадукцыю ў Расеі. Таму займацца гэтым будзем, у нас знікае велізарная колькасць угоддзяў», - сказаў ён.