Лукашэнка загадаў эфектыўней кіраваць мяшкамі акцый

Кіраўнік запатрабаваў ад падначаленых удасканаліць сістэму кіравання дзяржмаёмасцю, уключаючы дзяржпакеты акцый у прадпрыемствах.

«Я заўсёды патрабую ад урада эфектыўнага кіравання прадпрыемствамі, а не толькі нейкімі пакетамі або мяшкамі... Тут у нас нямала праблем», - заявіў сёння Лукашэнка на нарадзе.

«Нават там, дзе ў дзяржавы кантрольны пакет акцый, квітнее самазаспакоенасць і ўтрыманства. Назіральныя саветы бяздзейнічаюць, аддаючы на водкуп дырэктарам усе сур'ёзныя рашэнні», - дадаў ён, нагадаўшы аб «Камунарцы» і «Спартаку», дзе «назіральныя саветы сталі інструментам у руках аднаго дзялка, і, думаю, не бясплатна», піша АФН.

Акрамя таго, паводле яго слоў, на беларускіх ААТ «часам прадстаўнікі дзяржавы не толькі стульваюцца з прыватнымі інвестарамі, а становяцца інструментам у іх руках».

Лукашэнка нагадаў, што дзяржава валодае пакетамі акцый 1738 ААТ, і ў назіральным савеце кожнага з іх ёсць прадстаўнік дзяржавы.

«Але, зірнуўшы на якасны склад такіх прадстаўнікоў, відаць, што гэта не заўсёды тыя людзі, якія там патрэбныя. Пытанне: навошта?» - заявіў ён.

Лукашэнка паведаміў, што на нарадзе будзе разгледжаны праект указа па ўдасканаленні сістэмы кіравання дзяржаўнай уласнасцю, павышэнню эфектыўнасці ўладальніцкага нагляду, выказаўшы свае перавагі.

«Капіраваць сістэму заходніх краін абсалютна непрымальна... (затое) лічу магчымым найуважлівым чынам вывучыць кітайскую сістэму. Галоўнае - гэта сістэма павінна быць дакладнай, простай і ні ў якім разе не павінна быць забюракратызаванай», - запатрабаваў ён.

«Трэба ўдасканальваць існуючую ў краіне сістэму, але не «агульна», уводзіць моцных назіральнікаў ад дзяржавы, якія будуць прыносіць карысць... Сістэма кіравання дзяржуласнасцю з'яўляецца дзейснай толькі ў тым выпадку, калі акцыянерныя грамадствы вырашаюць агульнадзяржаўныя задачы, а не замыкаюцца на вузка-карпаратыўных інтарэсах . Па-другое - працуюць прыбыткова і з добрай рэнтабельнасцю, па-трэцяе - мабільна рэагуюць на змены кан'юнктуры рынку», - сказаў на заканчэнне Лукашэнка.