У Дзяніса Садоўскага хочуць забраць дзяцей?
29- 5.10.2012, 11:47
Адказны сакратар Беларускай Хрысціянскай Дэмакратыі Дзяніс Садоўскі быў адным з каардынатараў байкоту ў Менску.
28 жніўня ён быў затрыманы падчас расклейвання плакатаў за байкот выбараў і асуджаны ў судзе Фрунзенскага раёна Менска на 10 сутак арышту.
5 кастрычніка да яго па месцы прапіскі прыйшла сацыяльны педагог сацыяльна-педагагічнага цэнтра Савецкага раёна Менска Галіна Гаўрылава, каб праверыць, у якіх умовах знаходзяцца яго дзеці - трохгадовы сын і пяцімесячная дачка ў сувязі з неаднаразовымі затрыманнямі Дзяніса Садоўскага.
Пры гэтым Гаўрылава груба пагражала праблемамі ў сям'і адказнага сакратара БХД, а, не знайшоўшы яго, абяцала шукаць яго з міліцыяй.
Як паведамляе прэс-служба БХД, у Дзяніса Садоўскага гэты візіт педагогаў выклікаў абурэнне. «Рэжым вырашыў падобным чынам націснуць на мяне, стварыць напружанне ў сям'і. Пры гэтым усім відавочна, што маё затрыманне 28 жніўня, як і гэта наведванне, палітычна матываваныя», - адзначыў ён.
У сваю чаргу сустаршыня БХД Віталь Рымашэўскі заявіў, што гэтыя дзеянні ўлад вельмі нагадваюць ціск, які аказваўся на сям'ю экс-кандыдата ў прэзідэнты Андрэя Саннікава, калі спецслужбы пагражалі забіць і выкрасці яго трохгадовага сына. «Гэта ўжо нават не аўтарытарныя метады. Гэта метады гітлераўскага гестапа, калі пачынаюць пагражаць маленькім дзецям», - падкрэсліў ён.