Уладзімір Лабковіч: Заявы Лукашэнкі - хлусня і паклёп
28- 12.11.2012, 16:23
Праваабаронца пракаментаваў сённяшнюю заяву дыктатара пра Алеся Бяляцкага.
«Безумоўна, словы Лукашэнкі - гэта, мякка кажучы, няпраўда. Не трэба тут прыкрывацца амерыканскімі ці іншымі прыкладамі. Шматлікія эксперты па справе Алеся Бяляцкага, не толькі беларускія, але і міжнародныя, адзначылі, што Бяляцкі быў асуджаны зусім не за нявыплату падаткаў. Фармальна - па гэтай прычыне, але на самой справе яго асудзілі за яго праваабарончую дзейнасць», - распавёў сайту charter97.org сябра Савета праваабарончага цэнтра «Вясна» Уладзімір Лабковіч.
Па словах эксперта, інфармацыя аб рахунках Алеся Бяляцкага, атрыманая ад краін Еўразвяза, не магла выкарыстоўвацца для асуджэння праваабаронцы:
«Тая інфармацыя, якая была прадастаўлена Літвой і Польшчай, не дае ніякіх прычын лічыць, што гаворка ідзе пра грошы, якія з'яўляюцца асабістым прыбыткам Алеся Бяляцкага. Гэта грошы на праваабарончую дзейнасць, што было адназначна даказана ў судзе і не толькі ў судзе. І таму мы маем справу не са злачынствам у фінансавай сферы, а выключна з палітычнай расправай над вядомым беларускім праваабаронцам».
«І гэта выказванне Лукашэнкі - чарговая хлусня і паклёп у дачыненні да сваіх апанентаў і грамадзянскай супольнасці ў прынцыпе», - падкрэсліў Уладзімір Лабковіч.
Нагадаем, сёння на сустрэчы са студэнтамі і выкладчыкамі Беларускага дзяржаўнага эканамічнага універсітэта дыктатар нагадаў аб сітуацыі, звязанай з пазбаўленнем волі кіраўніка праваабарончага цэнтра «Вясна» Алеся Бяляцкага:
«Супраць чаго яны змагаюцца? Ён асуджаны за нявыплату падаткаў па нашых законах. А інфармацыю нам прадставіў Еўрапейскі звяз, праз Літву, дзе ён хаваў гэтыя грошы. Так у Амерыцы пажыццёвае зняволенне можна займець за нявыплату падаткаў. Гэта нармальна. А тое, што ў нас не заплаціў падаткі з аднаго мільярда (бел. рублёў - заўв.), гэта нармальна. Як жа нармальна?»