Сяргей Каваленка: За ўсімі выбухамі ў Беларусі стаіць КДБ
44- 12.11.2012, 17:15
Уладзе цяпер трэба як мага больш запалохаць народ і зняць з сябе падазрэнні, лічыць былы палітвязень.
Сяргей Каваленка ўпэўнены, што за выбухам у Віцебску стаяць беларускія спецслужбы.
«Я лічу, што ўсе выбухі ў Беларусі - гэта справа рук КДБ. І гэты тэракт - звяно таго ж самага ланцуга. Падобнымі выбухамі ўлады пераследуюць некалькі мэтаў. Адна з іх - гэта адцягнуць увагу людзей ад байкоту псеўдавыбараў у псеўдапарламент, які прайшоў нядаўна», - заявіў былы палітвязень у інтэрв'ю сайту charter97.org.
Разам з тым, Сяргей Каваленка лічыць, што людзі не вераць афіцыйным версіям выбухаў.
«У людзей адкрываюцца вочы на тое, хто і як рэжысіруе гэтыя тэракты. Цяпер амаль ніхто не верыць што выбухі ў менскім метро маглі здзейсніць нейкія простыя слесар і электрык», - кажа ён.
На думку былога палітвязня, улады спрабуюць адцягнуць увагу народа ад праблем з эканомікай і пратэстаў.
«У грамадстве моцна растуць пратэстныя настроі, набліжаецца новая хваля эканамічнага крызісу. Уладам цяпер трэба як мага больш запалохаць народ і зняць з сябе падазрэнні, маўляў бачыце - нас таксама ўзрываюць, мы не маем ніякага дачынення да ўсіх папярэдніх выбухаў.
І гэта таксама пасыл кожнаму беларусу: сядзіце ціха, не выходзьце на плошчы, а то мы можам і вас абвінаваціць у якім-небудзь тэракце», - сказаў Сяргей Каваленка.
Нагадаем, вечарам 11 лістапада каля будынку Упраўлення КДБ па Віцебскай вобласці адбыўся выбух самаробнай піратэхнічнай прылады. Затрыманыя тры чалавекі.