Былы міністр абароны Грузіі абвінавачаны ў катаваннях

Былому міністру абароны Бачо Ахалая і начальніку аб'яднанага штаба Георгію Каландадзэ прад'яўленыя абвінавачванні ў катаваннях над вайскоўцамі.

«Вайскоўцы-кіроўцы 16 лютага 2010 года адмовіліся раніцай ісці на фіззарадку, матывуючы тым, што яны ноччу дзяжурылі. З мэтай іх пакарання па загадзе былога міністра абароны Ахалая ўсе 19 вайскоўцаў 18 лютага былі перавезены на ваенную базу ў горадзе Сэнакі, дзе іх збілі непасрэдна Бачо Ахалая, Георгій Каландадзэ і іншыя ўстаноўленыя асобы», - сказаў галоўны пракурор Грузіі Арчыл Кбілашвілі.

«Пасля гэтага збіцця 19 вайскоўцаў агалілі вышэй пояса і загналі ў лазню, у якой адключылі электраэнергію і ацяпленне.

У такім стане вайскоўцы знаходзіліся на працягу амаль трох сутак. Вайскоўцаў, мінімум, на працягу 36 гадзін не кармілі, і ім прыходзілася ў невыносным холадзе спаць на бетоннай падлозе», - паведаміў Кбілашвілі.

Паводле яго слоў, гэты эпізод расцэньваецца як катаванне і незаконнае пазбаўленне волі, што прадугледжвае да 10 гадоў зняволення, перадае «Інтэрфакс».

«У гэтым эпізодзе ўдзельнічаў і былы начальнік Аб'яднанага штаба Георгій Каландадзэ, які таксама збіваў вайскоўцаў, што расцэньваецца як злоснае перавышэнне паўнамоцтваў і прадугледжвае пазбаўленне волі ад пяці да васьмі гадоў», - сказаў галоўны пракурор.

Ён паведаміў таксама, што вызвалены судом з папярэдняга зняволення на мінулым тыдні пад заклад Г.Каландадзэ зноў можа быць узяты пад варту.

«Пасля прад'яўлення Каландадзэ абвінавачвання ў другім эпізодзе суд абавязаны на працягу 24 гадзін вынесці рашэнне адносна меры стрымання», - растлумачыў А.Кбілашвілі.

Між тым напярэдадні адвакат Гагіта Габаідзэ заявіў журналістам, што ні Б.Ахалая і ні Г.Каландадзэ не прызнаюць сябе вінаватымі ні ў адным з прад'яўленых пракуратурай абвінавачванняў.