27 траўня 2015, Серада, 23:00

У цэнтры Брэста расеец адкрыў стральбу

32

Інцыдэнт адбыўся познім вечарам 11 лістапада каля гульнявога клуба «Партал» на вуліцы Савецкай.

Па звестках charter97.org, грамадзянін Расеі спрачаўся з супрацоўнікамі аховы, якія вырашылі не пускаць госця ва ўстанову, паколькі яго ранейшыя візіты заканчваліся звычайна абразамі ў адрас персаналу. Тады расеец стаў пагражаць аднаму з ахоўнікаў пнеўматычным пісталетам і, дачакаўшыся яго на вуліцы, зрабіў стрэл у зямлю. На дапамогу калегу прыйшлі супрацоўнікі Дэпартамента аховы, якія выконвалі службовыя абавязкі ў клубе, а неўзабаве падаспела падмога ў асобе міліцэйскага нарада.

Хоць пнеўматычны пісталет у расейца быў канфіскаваны, сам ён пасля дачы тлумачэнняў быў адпушчаны: брэсцкія праваахоўнікі яшчэ не вырашылі, ці варта заводзіць па гэтым факце крымінальную справу.

Між тым гэта ўжо далёка не першы выпадак, калі грамадзяне Расеі аказваюцца замешанымі ў падобных інцыдэнтах у Брэсце. Так, 1 верасня ў гасцініцы «Эрмітаж» былі затрыманыя два п'яных расейца, адзін з якіх страляў з траўматычнага пісталета. Гэты від зброі «стралок» зарэгістраваў у сябе на радзіме, а ў Беларусь завёз незаконна. Тым не менш, і тады крымінальную справу заводзіць не сталі: парушальнікаў прыцягнулі да адміністрацыйнай адказнасці, і яны абышліся штрафам.

падзяліцца