Раздача зямлі працягваецца

Мінэканомікі прапаноўвае дазволіць продаж зямлі ў прыватную ўласнасць замежным інвестарам.

«У 2013 годзе прапануецца вырашыць пытанне прадастаўлення інвестарам зямельных участкаў у прыватную ўласнасць», - сказаў міністр эканомікі Мікалай Снапкоў, выступаючы ў чацвер у Менску на пленарным пасяджэнні Кансультатыўнага савета па замежных інвестыцыях пры ўрадзе Беларусі, перадае «Інтэрфакс».

Міністр таксама анансаваў чаканыя ў Беларусі змены нарматываў будаўніцтва і спрашчэнне працэдуры банкруцтва, з перадачай такіх аб'ектаў замежным інвестарам. Акрамя таго, ён падкрэсліў гатоўнасць ўрада распрацаваць механізм «справядлівай кампенсацыі ў выпадку канфіскацыі аб'екта інвестыцый».