14 тысяч зняволеных трапілі пад амністыю

У Беларусі завяршаецца амністыя, якая была прымеркаваная да 3 ліпеня.

«Разгледжана пытанне прымянення амністыі ў дачыненні да 14155 асуджаных. Усяго падпадае пад дадзеную амністыю 15068 чалавек, якія змяшчаюцца ў месцах пазбаўлення волі», - паведамілі агенцтву «Інтэрфакс-Захад» у аўторак у МУС Беларусі.

«Начальнікамі папраўчых устаноў закрытага тыпу вынесеныя пастановы аб вызваленні ад далейшага адбыцця пакарання 2671 чалавека. Прынята рашэнне аб скарачэнні тэрміну пакарання на адзін год у адносінах да 5322 асуджаных», - адзначылі ў МУС.

Адмоўлена ва ўжыванні амністыі 6162 асуджаным, удакладнілі ў міністэрстве.

15 чэрвеня законапраект аб амністыі быў накіраваны на разгляд у «парламент», у канцы чэрвеня закон быў прыняты.

Дакументам, у прыватнасці, прадугледжваецца прымяненне амністыі ў дачыненні да непаўналетніх, цяжарных жанчын, асоб пенсійнага ўзросту, інвалідаў, ветэранаў баявых дзеянняў і шэрагу іншых катэгорый асоб, у сілу іх асаблівага прававога статусу або стану здароўя. Таксама дадзены закон аб амністыі распаўсюджваецца на тых, хто асуджаны за асобныя «эканамічныя» злачынствы, пры ўмове поўнага пакрыцця прычыненай іх дзеяннямі шкоды.

«У законапраекце асабліва адзначаецца, што амністыя не можа быць прымененая да асоб, якія ўчынілі асобныя цяжкія і асабліва цяжкія злачынствы, у тым ліку карупцыйныя, прызнаных асабліва небяспечнымі рэцыдывістамі, асуджаных да пакарання ў выглядзе пажыццёвага зняволення, а таксама да асоб, якія не выканалі прадугледжаныя праектам закона ўмовы для вызвалення ад крымінальнай адказнасці і пакарання», - падкрэслілі ў прэс-службе.