Дональд Туск: Затрыманы тэрарыст звязаны з Брэйвікам
7- 20.11.2012, 17:32
Затрыманы ў Польшчы тэрарыст меў сувязі з Андэрсам Брэйвікам, які забіў 77 чалавек падчас двайнога тэракту ў Нарвегіі ў мінулым годзе.
Пра гэта заявіў у аўторак прэм'ер-міністр Польшчы Дональд Туск падчас прэс-канферэнцыі ў Варшаве, перадае «Інтэрфакс».
Ён паведаміў, што вывучэнне кантактаў Андэрса Брэйвіка дапамагло польскім следчым выйсці на магчымага тэрарыста.
Туск дадаў, што мужчына не хаваў свайго захаплення А.Брэйвікам.
Раней у аўторак патэнцыйны варшаўскі тэрарыст быў арыштаваны супрацоўнікамі Агенцтва ўнутранай бяспекі Польшчы.
Ён прызнаўся ў тым, што навучаў завербаваных ім людзей і праводзіў для іх вучэнні па выбуховай справе.
Пры ператрусе ў гэтага чалавека былі выяўленыя выбуховыя рэчывы, дыстанцыйныя выбухоўнікі, зброя і 1,1 тыс. адзінак боепрыпасаў.
Сярод магчымых мэтаў Агенцтва ўнутранай бяспекі называе прэзідэнта краіны, прэм'ера, сейм, а таксама міністэрствы замежных спраў і казначэйства (фінансаў) Польшчы.