Інвестар, які ўцёк з Віцебска, «знайшоўся» ва Украіне

Павел Гарадноў стварыў у Віцебску кампанію «Вітавія», супрацоўнікі якой з траўня не атрымлівалі зарплату.

Аказалася, што ён працягвае займацца авіяцыяй, але ўжо ў сумежных дзяржавах, пішуць «Народныя навіны Віцебска». Пра гэта стала вядома з сюжэту расейскага тэлебачання пра візіт дэлегацыі Сумскай вобласці Украіны ў Курск.

Між тым, грошы на рахунку «Вітавія» так і не з'явіліся нягледзячы на тое, што афіцыйныя СМІ раней паведамлялі аб тым, што праблемы авіякампаніі будуць вырашаны.

Цікава, што стварэнне «Вітавія» - не першая спроба Паўла Гараднова «інвеставаць» у беларускую эканоміку. Так, у красавіку 2007 года карэйскі партал «KoreaITNews» паведамляў аб заключэнні дамовы на пастаўку абсталявання WiMAX паміж Карэйскай федэрацыяй самба і сумеснай беларуска-чэшскай кампаніяй «Triple Telecom», 50% у якой належалі ўжо вядомай нам PDW-group s.r.o. Больш за тое, Павел Гарадноў заявіў сваім карэйскім партнёрам, што беларускі ўрад ужо выдзеліў для яго сеткі тры частотныя паласы. Паводле выдання, «Triple Telecom» планавала інвеставаць у пабудову сеткі WiMAX у Беларусі 300 мільёнаў даляраў на працягу трох гадоў. Як вядома, тэхналогія WiMAX з'явілася ў Беларусі толькі ў 2011 годзе, калі пачала тэставую эксплуатацыю сваёй сеткі расейская «Yota».

Таксама высветлілася, што ў Гараднова былі праблемы ў Чэхіі - паводле судовага рашэння збіраюцца прадаць офіс яго фірмы.