Эстонская амбасада будзе прадстаўляць НАТА
9- 23.11.2012, 12:23
З 1 студзеня 2013 года эстонская амбасада ў Менску стане кантактнай амбасадай НАТА ў Беларусі.
Пра гэта паведаміў «Інтэрфаксу» кіраўнік знешнепалітычнага ведамства Эстоніі Урмас Паэт (Urmas Paet).
«Галоўнай задачай кантактнай амбасады з'яўляецца знаёмства з мэтамі і дзейнасцю НАТА, а таксама стварэнне і ўмацаванне кантактаў у дзяржаве знаходжання», - сказаў Паэт.
Мандат кантактнай амбасады будзе дзейнічаць два гады. Па словах кіраўніка МЗС, дзейнасць амбасады Эстоніі як кантактнай амбасады НАТА сведчыць аб даверы да саюзніка і пашырае каналы сувязі, як у НАТА, так і ў кантактнай дзяржаве.
Паэт дадаў таксама, што мэтай кантактнай амбасады будзе абмен інфармацыяй і перадача ў НАТА аглядаў па пытаннях палітыкі бяспекі ў краіне знаходжання. Яму адводзіцца таксама вялікая роля ў правядзенні візітаў прадстаўнікоў НАТА на высокім узроўні.
Сістэма кантактных амбасад была створана ў 1992 годзе для падтрымкі працы Паўночнаатлантычнага савета па партнёрству і з'яўляецца адным з каналаў знаёмства з палітыкай НАТА ў дзяржавах-партнёрах.