banner1 banner1 banner1

23.11.2012

«Guardian» пра Андрэя Саннікава важная навіна 131

16:54, — Палітыка

«Guardian» пра Андрэя Саннікава

Лідэр «Еўрапейскай Беларусі» даў інтэрв'ю вядучай брытанскай газеце.

У 2010 годзе лідэр беларускай апазіцыі Андрэй Саннікаў прыняў удзел у прэзідэнцкіх выбарах у краіне. Ён не меў ілюзій адносна магчымасці «перамогі» на іх, піша «Guardian» (пераклад - charter97.org).

З моманту прыходу да ўлады ў 1994 годзе аўтарытарны кіраўнік краіны Аляксандр Лукашэнка трымаў яе ў жалезным кулаку. Але Саннікаў не чакаў ад рэжыму такіх рэпрэсій - самых жорсткіх за апошнія 20 гадоў.

Увечары ў дзень галасавання Саннікаў і каля 30 000 прыхільнікаў апазіцыі сабраліся на пакрытай снегам цэнтральнай плошчы Менска. Ён смутна памятае пра тое, што адбылося далей. Амапаўцы схапілі Саннікава, шпурнулі яго на зямлю, а затым жорстка збілі. «Я страціў прытомнасць, - кажа палітык. - Мая жонка і сябар накрылі мяне сваімі целамі. Яны выратавалі маё жыццё».

Калі Саннікаў прыйшоў у сябе, ён не мог хадзіць. Невядомы афіцэр міліцыі разбіў яму калена металічным шчытом, нага не рухалася. Сябры дапамаглі яму дабрацца да аўтамабіля журналістаў.

Па дарозе ў шпіталь супрацоўнікі спецслужбаў зноў спынілі машыну і выцягнулі яго. Яны зноў сталі збіваць Саннікава. «Я чуў крыкі маёй жонкі», - успамінае кандыдат у прэзідэнты. Яго арышт стаў вынікам загадзя спланаванай уладамі правакацыі з «штурмам» Дома ўрада.

Саннікава даставілі ў вядомую менскую турму КДБ, якую жыхары горада называюць «амерыканкай» (пасля распаду Савецкага Саюза Расея памяняла назвы спецслужбаў, КДБ там стала ФСБ, Лукашэнка захаваў старую назву). Ахоўнікі турмы адмовілі яму ў медыцынскай дапамозе. Калі Саннікава кінулі за краты, пры ім усё яшчэ было пасведчанне кандыдата ў прэзідэнты. Сябры, сям'я, міжнародная супольнасць асцерагаліся горшага, прайшлі тыдні перш чым высветлілася, што ён жывы.

Саннікаў - былы дыпламат і адзін з найбольш вядомых беларускіх апазіцыянераў. У турме ён правёў 16 месяцаў. У траўні 2011 года палітык быў асуджаны на пяць гадоў па абвінавачванні ў «падбухторванні да масавых беспарадкаў». Яго, як і іншых зняволеных, прыніжалі, прымушалі распранацца дагала падчас рэгулярных надглядаў.

У адзін з момантаў рэжым спрабаваў штурхнуць яго на самагубства. Яго пакінулі ў адзіночнай камеры разам з лязом брытвы і кавалкам вяроўкі.

Саннікава вызвалілі ў красавіку 2012 года. У жніўні Лукашэнка, апошні дыктатар Еўропы па выразе былога дзяржсакратара ЗША Кандалізы Райс, сказаў, што Саннікаў зноў можа быць арыштаваны. Ён, не жадаючы таго, вымушаны быў прасіць палітычнага прытулку ў Велікабрытаніі.

Жонка Саннікава Ірына Халіп і іх пяцігадовы сын Даня засталіся ў Менску. Фактычна яны - заложнікі рэжыму Лукашэнкі.

Падчас размовы ў Лондане Саннікаў сказаў, што Беларусь заслужыла рэпутацыю самай рэпрэсіўнай дзяржавы Еўропы.

«Лукашэнка з'яўляецца дыктатарам. Ён адкрыта так сябе называе. Часам ён спрабуе какетнічаць і кажа, што гэта не так, але ён прызнаваўся ў гэтым некалькі разоў, - кажа Саннікаў. - Як і іншыя дыктатары, Лукашэнка валодае жывёльным інстынктам захавання ўлады».

Знаходзячыся ў выгнанні, Саннікаў не можа сустрэцца са сваёй жонкай Халіп, вядомай журналісткай расейскай «Новой газеты». Яна таксама была заключаная ў турму ў снежні 2010 года за ўдзел у дэманстрацыі, улады прыгразілі забраць іх сына ў дзіцячы дом. Затым яна правяла месяцы пад хатнім арыштам КДБ. Два агента жылі ў яе кватэры, ёй было забаронена падыходзіць да акна, карыстацца тэлефонам і электроннай поштай.

У мінулым месяцы Лукашэнка «абяцаў» вызваліць яе падчас сустрэчы з уладальнікам газеты The Independent Яўгенам Лебедзевым, які прасіў аб яе вызваленні. Нягледзячы на гэта, ёй забаронена пакідаць Менск, паехаць да свайго мужа і складана працаваць у якасці журналіста.

Саннікаў апісвае сістэму кіравання Беларуссю як «калгасную дыктатуру».

Рэпрэсіі, якія былі зробленыя пасля прэзідэнцкіх выбараў, сталі следствам перамогі «сілавікоў» - прыхільнікаў жорсткай лініі на чале з Віктарам, адным з сыноў Лукашэнкі.

«Сістэма не мае ідэалогіі. Яна адмаўляе нацыянальныя каштоўнасці - мову, культуру, гісторыю. Яна засноўваецца толькі на жаданні захаваць уладу», - кажа Саннікаў.

Саннікаву 58 гадоў, ён вырас у Менску. Вывучаў англійскую мову і стаў працаваць у савецкай сістэме МЗС. Пасля абвяшчэння незалежнасці Беларусі ў 1991 годзе працаваў дыпламатам у ЗША і Швейцарыі. У 1995 годзе стаў намеснікам міністра замежных спраў. Сышоў у адстаўку ў знак пратэсту супраць палітыкі Лукашэнкі і стаў адным з арганізатараў дэмакратычнай ініцыятывы «Хартыя'97». Ён быў адным з некалькіх кандыдатаў у прэзідэнты, арыштаваных Лукашэнкам пасля выбараў 2010 года, паводле афіцыйных дадзеных, ён заняў другое месца.

На працягу амаль двух дзесяцігоддзяў знаходжання ва ўладзе Лукашэнка праводзіў палітыку балансавання паміж Захадам і Усходам, выкарыстоўваючы Брусэль супраць Масквы. Пасля падаўлення выступленняў у 2010 годзе ЕЗ зноў увёў забарону на ўезд для Лукашэнкі і 150 службовых асоб. Але, па словах Саннікава, дэмакратычны свет занадта спакойна ставіцца да таго, што адбываецца ў Беларусі. Гэта постсавецкая дзяржава не толькі адрозніваецца рэпрэсіўнасцю ўнутры краіны, але і гандлюе зброяй з краінамі-ізгоямі і падобнымі арганізацыям па ўсім свеце.

«Беларусь ўяўляе сабой пагрозу для міжнароднай бяспекі. Дыктатары кансалідуюцца. Яны ўтвараюць клуб», - сцвярджае ён.

Гэты клуб, як лічыць Саннікаў, становіцца ўсё большым. Лідэр апазіцыі кажа аб сваім песімізме ў адносінах да суседняй з Беларуссю Расеі, дзе прэзідэнт Уладзімір Пуцін пачаў уласныя рэпрэсіі супраць грамадзянскай супольнасці пасля свайго вяртання ў Крэмль у траўні.

«Расея ідзе шляхам Беларусі», - адзначае ён. Украіна і іншыя постсавецкія дзяржавы, такія як Грузія, ідуць у тым жа зваротным напрамку, лічыць палітык.

Знаходзячыся ў турэмнай камеры Саннікаў чуў пра паўстанні на Блізкім Усходзе ў мінулым годзе. Ён успамінае: «Калі я пачуў пра арабскую вясну, у мяне было амаль фізічнае адчуванне таго, што мы падрыхтавалі перамены ў Беларусі. Але хтосьці там наверсе вырашыў, што гэта павінна адбыцца ў іншым месцы. Гэта было несправядліва ў адносінах да Беларусі», - кажа ён з іроніяй. Палітык абвяргае ідэю аб тым, што самаабвешчаны бацька нацыі Лукашэнка мае масавую народную падтрымку. Цяжкі эканамічны крызіс у Беларусі паказаў, што ўзровень жыцця падае, нягледзячы на тое, што Расея ратуе Лукашэнку.

«Пераважная большасць беларусаў хацела б перамен», - кажа Саннікаў.

На дадзены момант Лукашэнка выжывае, звяртаючыся да тэрору, КДБ і таннага савецкага папулізму. У турме яго дапытваў кіраўнік КДБ Беларусі Вадзім Зайцаў. «Гэта было б смешна, калі б не было так сумна. Гэтыя людзі не мяняюцца. Яны вам хлусяць, выкарыстоўваюць ілжывую інфармацыю, ілжывыя абвінавачванні», - сказаў Саннікаў, успамінаючы, як Зайцаў абвінаваціў яго ў зносінах з замежнымі «шпіёнамі» і называў «марыянеткай Захаду».

Беларусь з'яўляецца невялікай краінай з насельніцтвам у 9 з паловай мільёнаў чалавек. Яе часта бачаць у якасці свайго роду тэматычнага парку савецкай эпохі і асацыююць са змрочным таталітарным кіраваннем. Умовы жыцця ў ёй былі парушаныя імклівай інфляцыяй і абясцэньваньнем нацыянальнай валюты. Але, па словах Саннікава, Беларусі ёсць што прапанаваць. Багатая культура, першакласны балет і музыка, прыродная прыгажосць азёр і лясоў. Ён перакананы, што пасля Лукашэнкі Беларусь можа далучыцца да заходняга мэйнстрыму і стаць квітнеючай еўрапейскай дзяржавай.

Саннікаў перакананы, што рэжым Лукашэнкі вырачаны.

«Я не бачу будучыні для яго», - кажа ён. Ён не можа прадказаць, калі ўпадзе рэжым, але дадае: «Гэта ўсяго толькі пытанне часу».

Фота - Шон Сміт


Навіны
па тэме


Напісаць каментар (131)

Экспарт




Курсы валют Нацыянальнага банка

Валюта  19.12.14  20.12.14
EUR13 390,0013 390,00
USD10 890,0010 890,00
RUB184,00184,00

Меркаванне


Ложь и безумие диктатур

Ложь и безумие диктатур

Валерий Костка

Finita la commedia

Finita la commedia

Леонид Моряков

Не забудьте выключить телевизор

Не забудьте выключить телевизор

Ирина Халип

Возвращение «возвращенного» Крыма

Возвращение «возвращенного» Крыма

Дмитрий Дрозд

«Русский мир» становится китайским

«Русский мир» становится китайским

Александр Томкович



Учора на сайце:

наведвальнікаў 402111
праглядаў 2651021

пн аў ср чц пт сб нд
1 2 3 4 5 6 7
8 9 10 11 12 13 14
15 16 17 18 19 20 21
22 23 24 25 26 27 28
29 30 31

Старая версія сайта

Канстытуцыя Рэспублікі Беларусь:

"Артыкул 34. Грамадзянам Рэспублiкi Беларусь гарантуецца права на атрыманне, захоўванне i распаўсюджванне поўнай, дакладнай i своечасовай iнфармацыi аб дзейнасцi дзяржаўных органаў, грамадскiх аб'яднанняў, аб палiтычным, эканамiчным, культурным i мiжнародным жыццi, стане навакольнага асяроддзя..."

Падпіска

       

Пакіньце Ваш e-mail: