«Беларуськалій» абклалі новымі паборамі

Улады абавязалі ААТ «Беларуськалій» выплаціць дадатковы экспартны збор за экспарт калійных угнаенняў, што ажыццяўляецца ў перыяд з 1 студзеня па 31 ліпеня 2012 года.

Аб гэтым паведамілі агенцтву «Інтэрфакс-Захад» у міністэрстве фінансаў Беларусі.

Там растлумачылі, што адпаведны ўказ N530 Аляксандр Лукашэнка падпісаў 22 лістапада бягучага года.

Як адзначаецца ў дакуменце, плацельшчыкамі такога збору з'яўляюцца арганізацыі, якія рэалізуюць выключнае права знешняга гандлю (у частцы экспарту) мінеральнымі або хімічнымі калійнымі ўгнаеннямі і ажыццяўляюць іх вываз за межы краін Еўразійскай эканамічнай супольнасці, за выключэннем вывазу ў краіны, з якімі Беларусь заключыла міжнародныя дамовы аб свабодным гандлі.

Базай для вылічэння збору служыць аб'ём угнаенняў у натуральным выражэнні, вывезеных з 1 студзеня па 31 ліпеня 2012 года, стаўка збору складае Br279,8 тыс. ($33) за 1 тону угнаенняў. Збор выплачваецца плацельшчыкам з уласных сродкаў, што застаюцца ў распараджэнні плацельшчыка пасля выплаты падаткаў і збораў і абавязковых адлічэнняў часткі прыбытку, і залічваецца ў рэспубліканскі бюджэт.

Плацельшчык абавязаны ажыццяўляць выплату збору штомесяц роўнымі долямі да канца 2012 года, пачынаючы з месяца афіцыйнага апублікавання ўказа. Пры гэтым ён распаўсюджвае сваё дзеянне на адносіны, якія ўзніклі з 1 студзеня 2012 года.

Як растлумачылі ў Мінфіне, у Беларусі з 1 верасня 2009 года, у адпаведнасці з указам кіраўніка N525 ад 26 кастрычніка 2009 года, устаноўлена пошліна на вываз калійных угнаенняў. З 1 чэрвеня 2011 года стаўка пошліны складае 75 еўра за 1 тону.

«Устаноўлены ў адпаведнасці з указам прэзідэнта N530 збор з'яўляецца дадатковым зборам, ён ніяк не закранае ўведзеную раней пошліну на экспарт калійных угнаенняў», - растлумачылі ў Мінфіне.

Як паведаміў у нядзелю першы віцэ-прэм'ер Беларусі Уладзімір Сямашка, дзяржава мае права адбіраць звышпрыбыткі у акцыянерных таварыстваў, у статутным капітале якіх яно валодае 100% акцый. «Я не магу назваць лічбы, але нашыя прадпрыемствы, як і многія прадпрыемствы калійнай галіны, працуюць з добрай рэнтабельнасцю. Ёсць цвярозыя эканамічныя разлікі, якія кажуць пра тое, што, каб весці бягучую дзейнасць, рэалізоўваць інвестыцыйныя праграмы, патрэбна пэўная сума, а ўсе астатняе пасля выплаты падаткаў і падатку на прыбытак дзяржава мае права канфіскаваць і накіраваць на іншыя неабходныя мэты», - сказаў першы віцэ-прэм'ер.

Як раней паведамлялася, Аляксандр Лукашэнка ўказам № 482 ад 24 кастрычніка 2011 года вызначыў ЗАТ «Беларуская калійная кампанія» (БКК) выключным экспарцёрам толькі калійных угнаенняў. У адпаведнасці з указам, «выключнае права знешняга гандлю (у частцы экспарту) мінеральнымі або хімічнымі калійнымі ўгнаеннямі замацоўваецца за дзяржавай і рэалізуецца ААТ «Беларуськалій» і ЗАТ «БКК». Пры гэтым ААТ «Беларуськалій» ажыццяўляе вываз калійных угнаенняў за межы Беларусі і іх рэалізацыю толькі ЗАТ «БКК», якое ажыццяўляе продаж набытых калійных угнаенняў за межамі рэспублікі. Калійныя ўгнаенні, якія вывозяцца за межы Беларусі, прад'яўляюцца да мытнага афармлення ААТ «Беларуськалій».

Такім чынам, БКК страціла выключнае права знешняга гандлю (у частцы экспарту) мінеральнымі або хімічнымі азотнымі ўгнаеннямі, што вырабляюцца ААТ «Гродна Азот», які атрымала ў лістападзе 2010 года.

Раней таксама паведамлялася, што Мінфін Беларусі рыхтуе праект дзяржаўнага рашэння, які прадугледжвае ўвядзенне заднім чыслом, з 1 студзеня 2012 года, у рэспубліцы ўнутранай экспартнай пошліны на нафтапрадукты.