Русы абвінаваціў сельгаспрадпрыемствы ў сабатажы

Намеснік прэм'ер-міністра Беларусі заяўляе пра тое, што прадпрыемствы аграрнага сектара нядбала ставяцца да пагашэння крэдытаў, прыцягнутых на куплю сельгастэхнікі па лізінгавых схемах.

«Фінансавыя абавязацельствы гаспадарак на 1 кастрычніка складаюць Br47 трлн, нас асабліва насцярожваюць крэдыты, узятыя прадпрыемствамі на лізінг сельгастэхнікі, гэта Br23 трлн», - заявіў Міхаіл Русы, выступаючы ў сераду ў беларускім «парламенце», піша «Інтэрфакс».

«Ідзе сабатаж па пагашэнні гэтых крэдытаў. Усе спадзяюцца, што нешта будзе спісана», - сказаў віцэ-прэм'ер.

Ён падкрэсліў, што беларускія ўлады, рэалізуючы палітыку скарачэння дзяржпадтрымкі АПК, не плануюць прадастаўляць прадпрыемствам якіх-небудзь льгот па пагашэнні гэтых крэдытаў. Віцэ-прэм'ер дадаў, што дзяржава прадастаўляе аграрнаму сектару льготныя ўмовы па крэдытаванню цэлага шэрагу дзяржпраграм, аднак, крэдыты на закупку сельгастэхнікі ў гэты пералік не ўваходзяць.

«Усе схемы пагашэння крэдытаў распісаны па гадах. Нічога не будзе спісвацца, трэба плаціць па сваіх абавязацельствах», - падкрэсліў Русы.