Канстытуцыйны суд выявіў парушэнне праў... чыноўнікаў
31- 29.11.2012, 11:17
Канстытуцыйны суд РБ, мабыць, упершыню за гісторыю свайго існавання выявіў у краіне парушэнне праў чалавека і запатрабаваў ад уладаў ліквідаваць гэтае прававое бязмежжа.
Але гаворка, вядома ж, не ідзе аб гарантаваных Канстытуцыяй РБ дэмакратычных правах і свабодах, якія парушаюцца шматлікімі заканадаўчымі актамі, піша АФН.
Парушэнне выявілася зусім у іншай сферы, прычым адразу ж, як толькі былі закранутыя інтарэсы беларускіх чыноўнікаў і менеджменту дзяржпрадпрыемстваў.
«У зваротах, якія паступаюць у Канстытуцыйны суд, грамадзяне ставяць пытанне аб неправамернасці нарматыўных палажэнняў, згодна з якімі камандзіровачныя расходы па праезду не пакрываюцца без прадстаўлення праязных квіткоў і іншых дакументаў у арыгінале», - паведамляе прэс-служба КС.
Нескладана здагадацца, што праблема ўзнікла з пашырэннем продажаў авія і чыгуначных квіткоў праз інтэрнэт, а раздрукаваныя на лакальным прынтары квіткі зашуганыя бухгалтэрыі большасці прадпрыемстваў адмаўляюцца прымаць за арыгіналы. І ў пэўнай ступені маюць рацыю, бо добра разумеюць, у якой прававой краіне ім даводзіцца працаваць.
Для аднаўлення справядлівасці было б дастаткова афіцыйнага растлумачэння Міністэрства па падатках і зборах з нагоды таго, што раздрукаваныя на прынтары электронныя квіткі з'яўляюцца арыгінальнымі па такіх-та прыкметах або ў такіх-та выпадках, тым больш што камандзіровачнае пасведчанне ніхто не адмяняў.
Але праблема дайшла да КС, які з радасцю ўхапіўся за непалітычную тэму і аднавіў справядлівасць.
«Саўміну прапанавана прыняць ва ўстаноўленым парадку меры, накіраваныя на адпаведнае ўдакладненне прававога рэгулявання кампенсацыі работнікам расходаў па праезду пры службовых камандзіроўках», - гаворыцца ў паведамленні.
Падобнымі парушэннямі праў чалавека КС РБ гатовы займацца ў рэжыме 24/7, абы толькі пазбавіць сябе ад перспектывы разгляду на адпаведнасць Канстытуцыі паправак тыпу «больш за трох не збірацца». Бо гэта толькі па Канстытуцыі КС з'яўляецца незалежнай ад усіх структурай...