Рабочыя з Паўлавічаў: «Лукашэнка ляціць бамбіць, што не дапалілі!»

Рабочыя, якія разбіраюць сумна знакамітую вёску Паўлавічы, лічаць, што ў тым, што здарылася, вінаваты Лукашэнка.

У спаленай уладамі вёсцы пабывалі карэспандэнты «Белгазеты». На іх думку, здалёку выгляд экс-Паўлавічаў падобны на ілюстрацыі да зборніка пасляваеннай беларускай літаратуры. Побач з нешматлікімі прыцярушанымі снегам рэшткамі дамоў - класічныя забытыя дзіцячыя цацкі, перавернуты кош з нядаўна сабранай, яшчэ зялёнай травой, бітыя талеркі, сабачая будка без сабакі.

Частка рабочых разбірае Паўлавічы на металалом, іншая распілоўвае мясцовыя таполі. «Ідзі сюды, тут зямля яшчэ цёплая! - клікае карэспандэнта адзін з іх. – Дом, які гарэў, закапалі, ён да гэтага часу дыміць... »

- Столькі матэрыялу, усё спалена! - кажа яго калега. - Можна ж было ўсё разабраць, людзям аддаць на дровы. Зноў-такі зруб навошта паліць? А яны ўсё папалілі - дрэвы, яблыні! Э-эх!

Верталёт, які пралятае над Паўлавічамі, выклікае ў рабочых прыліў весялосці: «Лукашэнка ляціць бамбіць, што не дапалілі!»

Наогул, яго імя ў вёсцы памінаюць часта: «Хто вінаваты? Лукашэнка вінаваты! Куды ён глядзіць? Узялі вёску за тры дні сцерлі!»

- Кажуць, тут фабрыку абутковую будаваць будуць, - падзялілася карэспандэнт сталічнымі чуткамі.

- А я па тэлевізары чуў, што будуць пашыраць футравы камбінат, - уступіў у гутарку адзін з рабочых.

- Ды што ты мог чуць, ты тэлевізар не глядзіш! - заспрачаліся калегі.

- А менш трэба бацьку паказваць, я тады менш пляваць у тэлевізар буду!..

Нагадаем, без афіцыйнага папярэджання, прама на вачах у жыхароў вёскі Паўлавічы былі разбураныя іх дамы, гаспадарчыя пабудовы і сады. Мясцовыя жыхары звязваюць гэта з чаканым прыездам Аляксандра Лукашэнкі ў Віцебск і патрабуюць кампенсацыі за надворныя пабудовы і знішчаныя сады, так як лічаць рашэнне 1992 года несапраўдным.