Маскоўскія ўлады адмовілі ў правядзенні «Марша свабоды»

Пры гэтым чыноўнікі не прапанавалі ўзамен прымальнага маршруту.

Па словах Аляксея Навальнага, удзельнікі перамоў занялі максімальна гнуткую пазіцыю, гаворачы з чыноўнікамі аб шэсці па любым маршруце з заканчэннем на любой з шасці цэнтральных плошчаў, аднак атрымалі адмову. «Афіцыйна: толькі што мэрыя канчаткова адхіліла нашае законнае апавяшчэнне аб шэсці. 15 снежня мы ўбачымся на Лубянскай плошчы», - напісаў ён у сваім мікраблогу.

У мэрыі фактычна пацвердзілі, што дамоўленасць не была дасягнутая, паведамляе Lenta.ru.

«Калі хтосьці справакуе людзей выйсці на вуліцы і падставіць людзей, то адказнасць будзе на іх», - заявіў кіраўнік дэпартамента рэгіянальнай бяспекі мэрыі Масквы Аляксей Маёраў. «Калі сітуацыя не змяняецца, то ў сераду мы паведамім пракуратуру, і ўсе арганізатары будуць папярэджаныя аб тым, што мерапрыемства не можа быць праведзена. Будзем пераконваць людзей, што не трэба ісці на канфлікт з супрацоўнікамі праваахоўных органаў», - дадаў ён.

Раней сталічныя ўлады адхілілі некалькі варыянтаў маршруту шэсця, прапанаваных апазіцыяй. З іх два прадугледжвалі заканчэнне шэсця на Лубянскай плошчы, мітынг арганізатары ладзіць не маюць намеру. 7 снежня ў мэрыі заявілі, што апазіцыйнае шэсце не павінна ствараць перашкод для жыцця горада. Улады прапанавалі шэсце ад Пушкінскай плошчы да праспекта Сахарава, аднак апазіцыю гэты варыянт не задаволіў. Арганізатары патрабавалі, каб працягласць маршруту складала не менш чатырох кіламетраў, а канчатковай кропкай шэсця была адна з цэнтральных плошчаў.