Суд над намеснікам Ладуцькі пачнецца 20 снежня

Менскі абласны суд пачне разглядаць крымінальную справу ў дачыненні да былога першага намесніка старшыні Менгарвыканкама Ігара Васільева 20 снежня.

Аб гэтым паведамілі агенцтву «Інтэрфакс-Захад» у чацвер у Менскім абласным судзе.

Як раней паведамляла агенцтва са спасылкай на Генпракуратуру, на мінулым тыдні справа Ігара Васільева накіраваная ў Вярхоўны суд для вызначэння падсуднасці.

«Яму інкрымінуецца здзяйсненне злачынства, прадугледжанага ч.3 арт.430 КК (атрыманне хабару асобай, якая займае адказнае становішча, у асабліва буйным памеры), за заключэнне інвестыцыйнай дамовы паміж Менскім гарвыканкамам і суб'ектам гаспадарання Чэхіі», - паведамілі ў Генпракуратуры.

Мера стрымання ў дачыненні да абвінавачанага пакінута ранейшай - утрыманне пад вартай.

Як раней паведамляла агенцтва са спасылкай на КДБ, «Ігар Васільеў быў затрыманы супрацоўнікамі КДБ 6 ліпеня 2012 года, у сваім службовым кабінеце, пасля атрымання першай часткі хабару ў памеры $250 тыс».

«На падставе атрыманых матэрыялаў, Камітэтам дзяржбяспекі ў дачыненні да яго была ўзбуджаная крымінальная справа па ч.3 арт.430 Крымінальнага кодэкса (атрыманне асобай, якая займае адказнае становішча, хабару ў асабліва буйным памеры)», - паведамілі ў КДБ.

«У ходзе допыту І.Васільеў сваю віну прызнаў цалкам. У дачыненні да чыноўніка была прымененая мера стрымання ў выглядзе ўтрымання пад вартай. Матэрыялы крымінальнай справы былі перададзеныя ў Следчы камітэт для далейшага расследавання», - адзначылі ў КДБ.

Па дадзеных Камітэта дзяржбяспекі, «чыноўнік вымагаў хабар у памеры $500 тыс. у прадстаўнікоў еўрапейскага прадпрыемства-інвестара, за спрыяльнае вырашэнне пытання, звязанага з заключэннем інвестыцыйнай дамовы на агульную суму больш як $30 млн. Паводле пастаўленай перад камерсантамі умове, перадача грашовых сродкаў павінна была ажыццяўляцца двума роўнымі часткамі, па $250 тыс».