Сурыкаў спадзяецца на цуд
4- 14.12.2012, 12:40
Беларусь і Расея падпішуць балансы па пастаўцы нафты і нафтапрадуктаў на 2013 год у рабочым парадку, крызісу з пастаўкамі нафты нібыта не будзе.
Пра гэта заявіў агенцтву «Інтэрфакс-Захад» амбасадар Расеі ў Беларусі Аляксандр Сурыкаў.
«Балансы будуць падпісаныя ў рабочым парадку», - сказаў Сурыкаў, адзначыўшы, што гэтыя дакументы па шэрагу прычын не былі падпісаныя на пасяджэнні «саюзнага» Саўміна 12 снежня ў Маскве.
На пытанне агенцтва аб тым, не ці паўстане ў пачатку студзеня 2013 года ў Беларусі крытычная сітуацыя ў нафтаперапрацоўцы ў сувязі з дэфіцытам сыравіны, ці не ўстануць беларускія НПЗ, Сурыкаў адказаў: «Не, вядома, такой сітуацыі не будзе». «Я думаю, усё будзе нармальна, ніякага крызісу не адбудзецца», - сказаў амбасадар.
Сурыкаў дадаў, што не валодае інфармацыяй аб тым, ці абмяркоўвалася пытанне аб нафтавых балансах падчас нядаўняй сустрэчы кіраўнікоў урадаў Расеі і Беларусі.
Дыпламат дадаў, што лічыць мэтазгодным складанне балансаў па нафце і нафтапрадуктах і шэрагу іншых тавараў паміж Расеяй і Беларуссю, нягледзячы на тое, што краіны звязваюць адносіны ў рамках Саюзнай дзяржавы і АЭП. «Узгадненне і падпісанне балансаў гэта цалкам нармальны працэс, бо мы ўзгадняем не толькі балансы па гандлі, але і балансы па вытворчасці. Раз у нас цяпер няма дзяржплана, патрэбныя балансы, каб нашыя эканомікі працавалі сінхронна», - падкрэсліў Сурыкаў.