Сувязі з паслом у Менску прывялі Лібэрмана да адстаўкі
35- 14.12.2012, 20:18
Кіраўнік МЗС Ізраіля Авігдор Лібэрман паведаміў сёння, што сыходзіць у адстаўку для таго, каб засяродзіцца на сваёй абароне ў судзе.
Лібэрман таксама падаў у Кнэсэт (парламент) запыт аб зняцці з яго статусу дэпутацкай недатыкальнасці, каб ягоная справа магла быць хутчэй разгледжаная, перадае «Радыё Свабода».
У чацвер генеральны пракурор абвясціў, што пракуратура пастанавіла скончыць асноўную справу супраць Лібэрмана што да магчымага адмывання грошай, расследаванне якой доўжылася больш за 10 гадоў. У суд будзе перададзенае толькі абвінавачванне супраць Лібэрмана за злоўжыванне грамадскім даверам. Следства падазрае, што Лібэрман, стаўшы міністрам замежных спраў, рабіў былому ізраільскаму амбасадару ў Беларусі Зеэву Бэн-Ар'е пратэкцыю нібыта ў падзяку за тое, што той у свой час з уласнай ініцыятывы даваў яму канфідэнцыйную інфармацыю.
Пры гэтым пракуратура абвінавачвае кіраўніка МЗС у тым, што ён не паведаміў адпаведным органам аб гэтых дзеяннях Бэн-Ар'е. Лібэрман, які ўзначальвае таксама партыю «Наш дом - Ізраіль», выказаў надзею, што судовы працэс скончыцца да парламенцкіх выбараў, прызначаных на 22 студзеня 2013 года.