Мальцаў: Улады не хаваюць інфармацыю ад людзей

Дзіўную заяву зрабіў дзяржсакратар Савета бяспекі.

«У Беларусі няма палітыкі ўтойвання фактаў», - заявіў Мальцаў, якога цытуюць афіцыйныя крыніцы.

Паводле яго слоў, прэс-сакратары дзяржаўных структур павінны аператыўна рэагаваць на падзеі і не даваць няслушнай інфармацыі нават па нейкай адной дэталі, піша АФН.

Добрым доказам таго, што Мальцаў хлусіць аб праўдзе, з'яўляюцца дзеянні прэс-службы і іншых прадстаўнікоў Мінабароны РБ (Мальцаў не так даўно займаў пасаду міністра абароны) вакол палёту шведскага самалёта і плюшавай бамбардзіроўкі Беларусі.

Менш бяскрыўднымі прыкладамі з'яўляюцца тыповыя заявы большасці прэс-сакратароў беларускіх дзяржаўных органаў улады, такія як «Першы раз пра гэта чую», «Мне пра гэта нічога невядома», «Мы чуткі і здагадкі не каментуем», «Мне няма чаго пра гэта сказаць», «Я не ўпаўнаважаны каментаваць дадзеную тэму», «Гэта не ваша справа», «Калі вас нешта цікавіць, дасылайце нам пісьмовы запыт і на працягу месяца атрымаеце адказ», «Вельмі прыемна, але мне вам сказаць няма чаго», «Я не хачу з вамі гаварыць».

Падобныя адказы затым падмацоўваюцца заявай, што ўся інфармацыя, якую дадзены дзяржорган ўлады лічыць патрэбным данесці да грамадскасці, «вывешваецца на афіцыйным сайце».

Аднак сітуацыя можа кардынальна змяніцца, то ёсць пагоршыцца. У прыватнасці Мальцаў заявіў, што сучасныя ўмовы патрабуюць не пасіўнага назірання за тым, што адбываецца ў Інтэрнэце, а неабходнасці «праводзіць там дзяржаўную палітыку». Паводле яго слоў, прэс-сакратары павінны выходзіць у сацыяльныя сеткі і, мяркуючы па ўсім, даводзіць да карыстальнікаў «сапраўдную праўду».

Нагадаўшы аб 3 млн. актыўных беларусаў у інтэрнэце, дзяржсакратар Савета бяспекі заявіў: «Гэты прагрэс патрабуе адэкватнай працы прэс-службаў: адстаў на секунду - адстаў назаўжды». Іншымі словамі - прыйшоў час актыўнага прамывання мозгу беларускім карыстальнікам інтэрнэту.