«Новае жыццё» збіраецца на ўсяночную малітву перад высяленнем

Пратэстанцкую царкву «Новае жыццё» напярэдадні высялення наведаў намеснік амбасадара Велікабрытаніі Джым Казенс.

Па патрабаванні Вышэйшага гаспадарчага суда царква «Новае жыццё» павінна пакінуць свой будынак 5 снежня. У знак салідарнасці і падтрымкі пастары цэркваў хрысціян веры евангельскай правялі сумесную малітву, перадае «Радыё Свабода».

У царкве «Новае жыццё» Джым Казенс правёў больш за гадзіну. У размове з пастарам Вячаславам Ганчарэнкай дыпламат паведаміў, што падзеі вакол царквы вядомыя і хвалююць прадстаўнікоў місій і ўрадаў многіх еўрапейскіх краін, а таксама выказаў падтрымку і надзею, што гвалту супраць царквы не будзе. Падтрымку «Новаму жыццю» выказалі таксама кіраўнікі многіх пратэстанцкіх цэркваў у Беларусі, паведаміў юрыст царквы Сяргей Луканін:

«Сёння Вячаслаў Ганчарэнка і я былі запрошаныя на пастырскую малітву, на якой маліліся пастыры хрысціян веры евангельскай Менска і Менскай вобласці. Пасля малітвы многія пастыры асабіста падыходзілі да Вячаслава Ганчарэнкі і абяцалі прыйсці заўтра, каб падтрымаць нашу царкву. Для нас гэта вельмі вялікі знак, паколькі аб'яднаная царква хрысціян веры евангельскай налічвае больш за 500 афіцыйна зарэгістраваных цэркваў. А па колькасці гэта каля 50 тысяч чалавек. Гэта вельмі моцнае аб'яднанне, якое нас такім чынам падтрымала».

Як паведамляюць у царкве «Новае жыццё», Вячаслаў Ганчарэнка звярнуўся ў Менгарвыканкам з просьбай аб сустрэчы з кіраўніком гарадской вертыкалі Мікалаем Ладуцькам, аднак адказу на свой зварот не атрымаў. Тады вернікі накіравалі калектыўны зварот у Савет Міністраў і адміністрацыю Лукашэнкі з просьбай адмяніць пастанову Менгарвыканкама ад 2005 года аб канфіскацыі зямельнага ўчастка і прымусовым выкупе будынка. Менавіта гэтая пастанова і стала прычынай шматгадовага супрацьстаяння ўладаў з вернікамі, якія не маюць намер прызнаваць законнымі іх дзеянні і выконваць загады.

На 5 снежня Гаспадарчы суд Менска прызначыў прымусовае высяленне рэлігійнай абшчыны хрысціян поўнага Евангелля «Царква «Новае жыццё» з дома № 72 па вуліцы Кавалёва. Адпаведнае прадпісанне абшчына атрымала 27 лістапада. Прымусовае высяленне, як гаворыцца ў дакуменце, прызначана «на падставе судовага загаду гаспадарчага суда горада Менска па справе № 526-12/2009 ад 23 кастрычніка». Кіраўніку царквы прадпісана да 11 раніцы 5 снежня «вызваліць памяшканне, а таксама падрыхтаваць камплекты ключоў для перадачы спагнанніку». ЖРЭУ Маскоўскага раёна Менска, на тэрыторыі якога размешчаны будынак абшчыны, даручана «на момант прымусовага высялення забяспечыць транспарт, працоўную сілу і ўсё неабходнае для высялення даўжніка».

Плануемае высяленне царквы «Новае жыццё» адбудзецца ўслед за канфіскацыяй ўладамі памяшкання праваабарончага цэнтра «Вясна», і ў гэтым праваабаронцы бачаць агульную тэндэнцыю.