Сябра Андрэя Гайдукова выклікаюць у КДБ
6- 5.12.2012, 17:20
Лідэра незарэгістраванага наваполацкага «Саюза маладых інтэлектуалаў» выклікаюць у КДБ Віцебска для дачы сведкавых паказанняў па справе Андрэя Гайдукова.
- 5 снежня мне патэлефанаваў следчы Барысевіч, які вядзе справу Андрэя, і сказаў, што мне трэба прыехаць у абласное КДБ для дачы сведкавых паказанняў, - паведаміў «Салідарнасці» Яўген Канстанцінаў. - Не магу выказаць здагадку, якога роду сведчанняў ад мяне там чакаюць, бо я не быў разам з Андрэем ў Віцебску, дзе яго затрымалі, і нават не ведаў, што ён туды паехаў.
Зараз грамадскі актывіст будзе раіцца з праваабаронцамі аб мэтазгоднасці свайго візіту для дачы паказанняў.
Нагадаем, у канцы мінулага тыдня Андрэй Гайдукоў быў пераведзены ў СІЗА № 2 Віцебска. На днях ад арыштаванага актывіста, абвінавачанага ў шпіянажы, прыйшоў першы ліст.