Gallup: Рэальнае беспрацоўе ў Беларусі - 24%

Рэальнае беспрацоўе ў Беларусі прыкладна ў 40 разоў перавышае афіцыйнае.

Аб гэтым сведчаць дадзеныя ўласнага даследавання Gallup.

Паводле звестак Белстата, афіцыйнае беспрацоўе ў Беларусі па выніках 2011 года складае 0,6%. Дадзеная лічба адлюстроўвае долю беспрацоўных, зарэгістраваных у органах па працы, ад агульнага ліку эканамічна актыўнага насельніцтва. Такіх на канец мінулага года, па афіцыйных дадзеных налічвалася 4,655 млн. чалавек, у тым ліку 2,376 млн. жанчын і 2,279 млн. мужчын, піша АФН.

Беларусь не разлічвае ўзровень беспрацоўя па методыцы Міжнароднай арганізацыі працы, якая прадугледжвае ўлік не толькі афіцыйна зарэгістраваных у якасці беспрацоўных грамадзян, і але тых, хто ў справаздачны перыяд знаходзіўся ў пошуках працы.

У сваю чаргу, Gallup апытвае паўналетніх грамадзян на прадмет іх занятасці, удакладняючы ці працуе апытаны поўны або няпоўны працоўны дзень. Тым, хто прыходзіць на працу на няпоўны працоўны дзень, задаюць пытанне, ці хочуць яны перайсці на поўны працоўны дзень. Затым дадзеныя аб тых, хто заняты поўны дзень, сумуюцца з дадзенымі тых, хто працуе няпоўны працоўны дзень і не жадае пры гэтым пераходзіць на поўны, і такім чынам выводзіцца паказчык рэальнага беспрацоўя.

Паводле даследавання Gallup, узровень рэальнага беспрацоўя ў Беларусі па выніках 2011 сярод жанчын склаў 30%, сярод мужчын - 19%. Улічваючы суадносіны паміж эканамічна актыўнымі жанчынамі і мужчынамі, можна разлічыць агульны паказчык рэальнага беспрацоўя для Беларусі - 24%, што ў 40 разоў вышэй за афіцыйны паказчык.

Такая методыка дае магчымасць убачыць яшчэ адзін паказчык - разрыў паміж мужчынскім і жаночым беспрацоўем. У Беларусі такі разрыў складае 11 працэнтных пункта (для прыкладу, у Расіі - 3 п.п., у Саудаўскай Аравіі - 23 п.п.).