Дыктатар выставіў рахунак расейцам

Лукашэнка адзначае вялікія пазыкі суб'ектаў гаспадарання РФ перад беларускімі прадпрыемствамі.

Аб абавязках Расеі

Лукашэнка незадаволены сітуацыяй, якая складваецца з вяртаннем пратэрмінаваных пазык суб'ектамі гаспадарання Расеі беларускім прадпрыемствам.

«Асноўнымі даўжнікамі беларускіх арганізацый працягваюць заставацца суб'екты гаспадарання Расейскай Федэрацыі. Пры гэтым пратэрмінаваныя пазыкі расейцаў перавысілі запазычанасць беларускіх арганізацый перад імі ў два разы», - адзначыў Лукашэнка, заслухоўваючы даклад урада і Нацбанка аб рабоце эканомікі ў бягучым годзе і праектах прагнозу бюджэту і грашова- крэдытнай палітыкі на 2013 год, піша «Інтэрфакс».

Паводле яго слоў, «недахоп уласных рэсурсаў і высокія стаўкі па крэдытах стрымліваюць інвестыцыйную дзейнасць».

Зарплата ў $500

Лукашэнка ў чарговы раз паабяцаў зарплату ў $500 да канца года:

«Сярэдняя зарплата ў нас вырасла амаль да 4 млн рублёў. Гэта крыху больш за $470. Да канца года мы гарантавана выйдзем у сярэднім на $500. Пры гэтым рэальныя грашовыя даходы насельніцтва ўзрастуць на 17,5%, а рэальная заработная плата - на 21,5 %».

«Чаму так адбываецца?»

Беларускі кіраўнік адзначыў адставанне ў выкананні прагнозных паказчыкаў па росту ВУП і зніжэнню ўзроўню інфляцыі.

«Чатыры з 12-ці важнейшых паказчыкаў прагнозу на 2012 год пакуль не выконваюцца. У іх ліку галоўны - валавы ўнутраны прадукт, які ў нас склаў 103%, не дацягваючы 2-2,5%», - заявіў ён.

Лукашэнка таксама падкрэсліў, што насельніцтва па-ранейшаму хвалюе рост коштаў. «З пачатку года тэмп інфляцыі склаў 112%. І гэта пры тым, што курс беларускага рубля стабільны. Чаму так адбываецца?», - спытаў кіраўнік ў членаў урада і прадстаўнікоў Нацыянальнага банка.

Пракаповіч зоймецца імпартазамяшчэннем

«Уступленне Расеі ў СГА робіць рынкі АЭП арэнай жорсткай, канкурэнтнай барацьбы. Еўрапейскія і амерыканскія вытворцы, а таксама азіяцкія кампаніі актыўна асвойваюць рынкі Казахстана і Расейскай Федэрацыі. У цэлым сітуацыя ў сусветнай эканоміцы ўскладняецца, і ў сувязі з гэтым хачу пачуць ад урада і Нацыянальнага банка , як будзе забяспечана эканамічная бяспека краіны», - заявіў Лукашэнка.

У прыватнасці, ён спытаў, за кошт якіх дзеянняў у гэтых умовах будуць забяспечаны рост экспарту і станоўчае сальда знешняга гандлю ў бягучым і ў 2013 годзе.

«Мы павінны, безумоўна, захаваць прыток валюты ў краіну, для далейшага росту золатавалютных рэзерваў і падтрымання стабільнасці на валютным рынку», - сказаў Лукашэнка.

У сувязі з гэтым, паводле яго слоў, сур'ёзную заклапочанасць выклікае зніжэнне або запаволенне тэмпаў росту экспарту такіх найважнейшых тавараў, як аўтамабільная, сельскагаспадарчая і бытавая тэхніка, прадукцыя металургіі і дрэваапрацоўкі. У той жа час, працягнуў дыктатар, «пакуль няма адчувальных вынікаў па выкананні майго даручэння аб стварэнні новых вытворчасцей, здольных падтрымаць высокія тэмпы росту эканомікі».

Лукашэнка нагадаў таксама, што ім дадзена даручэнне да канца года завяршыць усе арганізацыйныя работы па комплекснай мадэрнізацыі дзяржаўных прадпрыемстваў. «Гэта значыць, у кожнага кіраўніка прадпрыемства, які выпускае ў месяц нават дзве табурэткі або адзін пісьмовыя стол, на стале павінен ляжаць план мадэрнізацыі прадпрыемства па выпуску канкурэнтаздольнай прадукцыі, арыентаванай на экспарт і імпартазамяшчэнне», - падкрэсліў прэзідэнт. «Калі мы не мадэрнізуем нашы прадпрыемствы, нам тут рабіць няма чаго", - сказаў А.Лукашэнка. У сувязі з гэтым, заявіў ён, «Пракаповіч (Пётр Пракаповіч - памочнік прэзідэнта - ІФ) вернуты да актыўнай дзейнасці на высокі ўзровень, яму даручана правесці праверку кожнага прадпрыемства на прадмет мадэрнізацыі».

«Нам жыццёва неабходна да 2015 года дасягнуць выручкі, у сярэднім на аднаго занятага, не менш як $60 тыс. Тады будзем жыць, тады будзе краіна», - заявіў кіраўнік.

Татальная мабілізацыя кадраў

«Задачы бягучага года і зачын на наступны год павінны быць забяспечаны безумоўна. На ўсіх узроўнях дзяржаўнай вертыкалі варта ўвесці татальную мабілізацыю кадраў для вырашэння абазначаных пытанняў», - заявіў сёння Лукашэнка.

Паводле яго слоў, «насцярожвае сітуацыя ў рэгіёнах» - на прагназуемыя значэнні росту валавога рэгіянальнага прадукту маглі выйсці толькі Віцебская і Менская вобласці.

«Прычым Віцебская - пераважна за кошт нафтахімічнага комплексу», - адзначыў Лукашэнка, звярнуўшы ўвагу, што практычна ўсе рэгіёны «цягне назад» будаўнічы комплекс.

«Падобна на тое, што нашы міністры і «губернатары» у папярэднія гады прывыклі толькі асвойваць выдзеленыя з бюджэту сродкі. А дзе ваша канкрэтная праца?.. Ні ўраду, ні «губернатарам» не варта прыкрывацца недахопам грашовых сродкаў. Толькі па кітайскіх крэдытах у нас адкрыта фінансаванне на $8 млрд. Але крэдытныя сродкі будуць накіроўвацца толькі на прарыўныя праекты і кантракты», - заявіў Лукашэнка.