Беларусь узбройвае Кітай для магчымай атакі ЗША

МЗКЦ працягвае пастаўляць колавыя цягачы для кітайскіх ракет.

Кітай выпрабаваў міжкантынентальную балістычную ракету, здольную даставіць ядзерную боегалоўку да Вашынгтона ці Масквы.

Пра гэта паведамляе часопіс ISH Jane's Defence Weekly.

Як вынікае з публікацыі, мабільны комплекс ракеты «Дунфэн-41» (што ў перакладзе азначае «Вецер з Усходу») з'яўляецца аналагам расейскіх мабільных комплексаў тыпу «Топаль» і «Ярс», аднак некалькі больш па памеру. Паводле ацэнак экспертаў, далёкасць палёту размешчанай на «Дунфэн-41» ракеты складае ад 10 да 14 тыс. км, пры гэтым яна здольная несці 10 ядзерных баявых блокаў індывідуальнага навядзення. Акрамя таго, у склад карыснай нагрузкі ўваходзяць ілжывыя цэлі, якія імітуюць боегалоўкі, прызначаныя для процідзеяння сістэме СРА, пішуць naviny.by.

Публікацыя аб выпрабаванні выклікала сур'ёзную заклапочанасць амерыканскіх вайскоўцаў, якія лічаць, што DF-41 створаны спецыяльна для нанясення ўдару па ЗША і здольны паражаць мэты на ўсёй іх тэрыторыі.

Праўда, кітайскі эксперт Вэй Гоань абверг факт выпрабавальнага пуску гэтай ракеты. Аднак ён прызнаў, што ВПК Кітая сапраўды вядзе распрацоўку міжкантынентальнай балістычнай ракеты новага пакалення, якая зможа паражаць цэлі ў любой кропке свету.

Паводле дадзеных спецыялізаваных крыніц, гэтая ракета з'яўляецца вынікам далейшай мадэрнізацыі МБР «Дунфэн-31» (DF-31), заходняе пазначэнне CSS-9. Падкрэслім, што DF-31 у свой час стала прарывам у стварэнні Кітаем ядзерных узбраенняў. Яе распрацоўка пачалася ў сярэдзіне 80-х гадоў, па задуме DF-31 павінна была замяніць ужо састарэлыя да таго часу першыя кітайскія МБР DF-4 (СSS-3).

Асноўнай цяжкасцю, з якой сутыкнуліся кітайцы, стала распрацоўка цвёрдага сумесевага ракетнага паліва. Яшчэ адным галаўным болем стала стварэнне і наладжванне серыйнай вытворчасці надзейных колавых шасі, прыдатных для транспарціроўкі і запуску балістычных ракет міжкантынентальнай далёкасці.

Прагрэс у распрацоўцы паліва ў кітайцаў намеціўся толькі ў другой палове 90-х гадоў. У 1995 годзе было праведзена першае палігонавае выпрабаванне начыненай ім ракеты. А 2 жніўня 1999 года агенцтва Сіньхуа паведаміла аб паспяховым пуску першай кітайскай МБР на цвёрдым паліве. 1 кастрычніка 1999 года яна была прадэманстравана на ваенным парадзе ў гонар 50-й гадавіны КНР.

Разам з іншай ваеннай тэхнікай у парадным разліку прайшлі 3 ракетавоза з транспартна-пускавымі кантэйнерамі (ТПК), у якіх мяркуецца, знаходзіліся новыя ракеты. Ракетавозы ўяўлялі сабой стандартныя 4-восныя грузавікі, якія буксіравалі паўпрычэпы з 8 восямі, і больш былі падобныя не на баявыя пускавыя ўстаноўкі (ПУ), а на дапаможныя транспартна-зараджальныя машыны.

Спецыялісты зрабілі выснову, што ў параўнанні з мабільнымі ПУ расейскіх МБР «Топаль» (на базе колавых цягачоў Менскага завода колавых цягачоў) кітайскія машыны валодаюць вельмі абмежаванай праходнасцю і таму не могуць лічыцца паўнавартаснымі баявымі сістэмамі.

Наколькі можна было зразумець з публікацый у замежных выданнях, пасля шэрагу беспаспяховых спроб распрацаваць добры ракетны транспарцёр сваімі сіламі кітайцы вырашылі выкарыстаць напрацоўкі савецкага ВПК. Дабро, пасля распаду СССР постсавецкія дзяржавы прапаноўвалі на продаж абсалютна ўсё.

І ўжо неўзабаве заходнія выведкі з дапамогай спадарожнікаў выявілі ў Кітаі 6-восные колавыя шасі падвышанай праходнасці беларускай вытворчасці МАЗ-547В (цяперашняе пазначэнне МЗКЦ-7916), якія ў свой час былі базай для мабільных ПУ ракет сярэдняй далёкасці РСД-10 «Піянер» ( або па-натаўску SS-20).

«Піянеры» былі ліквідаваныя ў 1990 годзе па заключанай паміж СССР і ЗША Дамове аб ліквідацыі ракет сярэдняй і меншай далёкасці. Аднак палажэнне аб утылізацыі распаўсюджвалася толькі на ракеты і пускавыя ўстаноўкі, але не датычылася колавых шасі, якія дазвалялася выкарыстоўваць у грамадзянскіх мэтах. Хутчэй за ўсё, менавіта канверсійныя шасі і былі выкарыстаны кітайцамі для сваіх першых па-сапраўднаму мабільных ракетных комплексах DF-31.

Ужо неўзабаве неабходнасць у абслугоўванні і рамонце гэтай складанай аўтатэхнікі, а таксама патрэба ў запчастках прымусілі Кітай наладзіць непасрэднае супрацоўніцтва з Рэспублікай Беларусь. Лагічным следствам сталі прамыя пастаўкі ў КНР вырабаў Менскага завода колавых цягачоў. З 2001 года ў якасці базавых для DF-31 выкарыстоўваюцца новенькія шматвосевыя шасі МЗКЦ-7916. Спачатку гэта былі вырабы беларускай, а затым (пасля стварэння ў Кітаі СП) кітайскай зборкі.

Аднак «Дунфэн-31» не ў поўнай меры адказваў амбіцыйным планам кіраўніцтва Кітая па дасягненню парытэту ў стратэгічных узбраеннях з асноўнымі глабальнымі супернікамі - ЗША і Расеяй. Таму практычна адначасова з засваеннем вытворчасці DF-31, выкарыстоўваючы створаны навукова-тэхнічны зачын, ВПК КНР прыступіў да распрацоўкі больш магутнага ракетнага комплексу DF-31A.

Згодна з замежнымі крыніцамі, пры яго распрацоўцы былі ўжытыя канструктарска-тэхналагічныя рашэнні, рэалізаваныя пры стварэнні савецкіх і расейскіх мабільных ракетных комплексаў грунтавога і чыгуначнага базавання. Асноўнымі напрамкамі дапрацоўкі сталі павелічэнне далёкасці палёту ракеты, масы галаўной часткі (ГЧ) і аснашчэнне яе сістэмамі пераадолення СРА.

Гэта запатрабавала павелічэння стартавай масы, памераў МБР і, адпаведна, выкарыстання колавага шасі большай грузападымальнасці і габарытаў. З 2006 года амерыканцы назіралі выпрабаванні мабільнага ракетнага комплексу на 8-воснам шасі (аналагічным МЗКЦ-79221) з падоўжаным кантэйнерам, у якім мяркуецца, знаходзілася ракета комплексу «Дунфэн-31а».

Наступным развіццём праекта з'яўляецца «Дунфэн-41», ракета якога павінна мець павялічаную (з 8 000 км да 12 000 км) далёкасць палёту. Мяркуецца, што гэтая ракета будзе абсталявана раздзяляючайся ГЧ (з 3-5 і больш баявымі блокамі) з варыянтамі магутнасцю 20, 90 і 150 КТ. З гэтай мэтай дапрацоўваюцца ступень развядзення і сістэма кіравання ракеты, якая абсталёўваецца астракарэкцыяй.

І, што немалаважна, для «Дунфэн-41» на базе беларускага прататыпа прадугледжана арганізацыя выпуску ўласнага 8-воснага колавага шасі (WS51200) з мэтай стварэння паўнавартаснай баявой мабільнай платформы, аналагічнай ПУ расейскіх «Топаля» і «Ярсаў».

Са стварэннем гэтага комплексу Кітай атрымае магчымасць накрываць ракетамі ўсю тэрыторыю ЗША.