Казахскія памежнікі адкрылі агонь па расейцам

Інцыдэнт адбыўся на мяжы Расеі і Казахстана.

Экіпаж казахскага верталёта Мі-8, які займаўся аховай дзяржаўнай мяжы, заўважыў у вадзе два маламерных плавальных сродкі, якія парушылі мяжу, піша newsru.com са спасылкай на памежслужбы Казахстана.

Па гучнай сувязі ім было загадана спыніцца, аднак тыя ў адказ толькі павялічылі хуткасць руху і інтэнсіўнасць манеўравання. «Для прымусовага спынення плаўсродкаў у адпаведнасці з артыкулам 31 Закона Рэспублікі Казахстан «Аб Дзяржаўнай мяжы РК» з борта верталёта была ўжыта зброя па рухавіках байд: рухавікі былі пашкоджаныя, малыя плаўсродкі спыніліся», - гаворыцца ў паведамленні памежнай службы.

У выніку абстрэлу двое з сямі расейцаў, якія знаходзіліся на судах, былі параненыя. Іх паднялі на борт памежнага карабля «Егемен», дзе аказалі першую медыцынскую дапамогу. Затым пацярпелыя былі дастаўленыя ў абласны шпіталь Атыраў і праапераваны. «У цяперашні час жыццю і здароўю пацярпелых нічога не пагражае», - адзначаецца ў паведамленні.

Астатнія ўдзельнікі пагоні былі затрыманыя. У дачыненні да ўсіх затрыманых грамадзян Расейскай Федэрацыі разглядаецца пытанне аб узбуджэнні крымінальнай справы за парушэнне мяжы.