Deutsche Welle: Беларускі КДБ змагаецца з ветракамі
78
6:15, — Палітыка
Арышты мадэратараў інтэрнэт-груп сведчаць аб тым, што КДБ мае намер душыць нават віртуальны пратэст.
Але перакрыць крыніцы непадкантрольнай інфармацыі спецслужбы не змогуць, перадае Deutsche Welle.
«Ляпіс Трубяцкі - бясплатны канцэрт у Менску», «Надакучыў нам гэты Лукашэнка» і «Толькі ШОС», - ужо самі назвы апазіцыйных супольнасцей сацыяльнай сетцы «У кантакце» забяспечваюць галаўны боль супрацоўнікам спецслужбаў і штатным ідэолагам. «Ляпіс Трубяцкі» - беларускі рок-гурт, якому па палітычных прычынах забаронена выступаць у краіне, Аляксандр Лукашэнка - кіраўнік Беларусі, а тры вялікіх літары ШОС з табліцы праверкі вастрыні зроку расшыфроўваюцца як «Шоб ён здох».
Усе тры інтэрнэт-праекта - толькі кампутарная мадэль рэальнасці, яны разлічаны на прыцягненне прыхільнікаў у асноўным з дапамогай эпатажу. Але за кароткі тэрмін колькасць удзельнікаў супольнасцей, як сцвярджаюць мадэратары, вырасла да 100 тысяч чалавек.
Прычым хуткасць раскруткі гэтых груп нагадвае леташнюю акцыю «Рэвалюцыі праз сацыяльныя сеткі» (РПСС). У разгар эканамічнага крызісу арганізатарам РПСС атрымалася ў лічаныя дні арганізаваць выхад на вуліцы многіх далёкіх ад палітыкі беларусаў, каб апладысментамі пазначыць пратэст супраць дзеянняў улад. Праўда, колькасць апладыруючых была нашмат меншай, чым віртуальных прыхільнікаў акцый, але галоўнае - сродкам іх мабілізацыі стаў інтэрнэт.
У зоне асаблівай увагі
Інтэрнэт для Беларусі традыцыйна лічыцца зонай свабоды. На самой справе сайты і інтэрнэт-супольнасці з палітычным кантэнтам знаходзяцца ў зоне асаблівай увагі спецслужбаў, паколькі беларускае заканадаўства адносіць да праяў экстрэмізму і крытыку функцыянераў улады.
Аднак па сутнасці КДБ заклапочаны не столькі крытыкай, колькі магчымасцямі аператыўнай камунікацыі, якімі валодаюць інтэрнэт-групы. Улады асцерагаюцца, што ў адсутнасці незалежных масавых СМІ інтэрнэт у Беларусі можа стаць арганізатарам новых масавых акцый, як гэта паказалі падзеі падчас правядзення акцыі РПСС і ў дзень прэзідэнцкіх выбараў 19 снежня 2010 года.
Сам па сабе лозунг «Далоў Лукашэнку!» наўрад ці прывядзе да змены рэжыму. У той жа час масавыя выступленні беларусаў цалкам могуць стаць рэальнасцю і выйсці з-пад кантролю ўлад, так як у адсутнасці рэформаў існуе пагроза паўтарэння эканамічнага крызісу ў краіне.
Вайна з ветракамі
Ператрусы ў кватэрах беларускіх мадэратараў суполкі «Надакучыў нам гэты Лукашэнка» паказваюць, што свабоду меркаванняў КДБ мае намер душыць нават у віртуальнай прасторы, а барацьбу, рэальную і электронную, весці па ўсіх франтах - ад арыштаў адміністратараў да перахопу кантролю над групамі сацыяльных сетак.
Нават калі спосабы гэтага процідзеяння іншадумству будуць звышсучаснымі, сутнасць яго застанецца такой жа дрымучай, паколькі адлюстроўвае ідэалогію беларускай улады - запалохаць нязгодных. Але перамагчы ў гэтай інфармацыйнай вайне рэжыму не атрымаецца. Аўдыторыя беларусаў у Сусветнай павуціне складае больш за 4 мільёны чалавек. Па колькасці карыстальнікаў сацыяльных сетак Беларусь - на трэцім месцы ў СНД, а беларускія інтэрнэт-юзэры адносяцца да ліку самых адукаваных у гэтай частцы постсавецкай прасторы.
Краіна лідзіруе і ў рэйтынгу маладых інтэрнэт-аўдыторый Усходняй і Цэнтральнай Еўропы. Што можа супрацьпаставіць гэтаму беларуская ўлада са сваімі спецслужбамі, якая толькі памнажае шэрагі праціўнікаў прымітыўным закручваннем гаек?
Напісаць каментар (78)
Экспарт
Новости партнеров
