Менчука, які адпісаў сваю кватэру дзяржаве, забілі

Жыхары нешчаслівай кватэры ў Менску перажылі дзве катастрофы, а апошні гаспадар быў забіты.

Менчук Дзмітрый Ракаўчук пакінуў сваю кватэру ў спадчыну Рэспубліцы Беларусь. Пра гэта беларусы даведаліся з учорашняга паведамлення прэс-службы Лукашэнкі.

«Аляксандр Лукашэнка ўзгадніў праект пастановы Савета міністраў «Аб прыняцці ў рэспубліканскую ўласнасць спадчыннай маёмасці». Спадчына ўключае ў сябе кватэру на вуліцы Брэсцкай у Менску, якую грамадзянін Беларусі Дзмітрый Ракаўчук адпісаў Рэспубліцы Беларусь», — гаворыцца ў ім.

Што гэта за таямнічая кватэра, лёс якой вызначаецца на ўзроўні кіраўніка дзяржавы, хто такі Дзмітрый Ракаўчук і чаму ён наважыў пакінуць яе дзяржаве?

«Наша Ніва» паспрабавала разабрацца ў дзіўнай сітуацыі.

Кватэра, якую атрымала дзяржава, знаходзіцца на адрасе Брэсцкая, 76. Дом быў пабудаваны ў 1972 годзе - звычайная пяціпавярховая панэлька. З вокнаў відаць возера і гарналыжны курорт «Сонечная даліна». Пра тое, што лёсам кватэры ў іх доме займаюцца на самым высокім узроўні, суседзі чуюць упершыню. Але пасля пачынаюць успамінаць усю таямнічую гісторыю гэтай нешчаслівай кватэры - № 66. Зрэшты, не выключаем, што паджылыя суседзі маглі прыхарашыць падзеі - нешта за 40 гадоў і забыліся.

Такім чынам, кватэру ў новапабудаваным доме атрымала сям'я - муж, жонка і двое дзяцей. Няшчасці ў кватэры № 66 пачаліся з іх.

Жонка ў тым жа 1972 была параненая падчас выбуху ў цэху Менскага радыёзавода на вуліцы Соф'і Кавалеўскай. Тады, паводле розных падлікаў, загінулі 120-140 чалавек.

Муж стаў сведкам іншай жудаснай катастрофы. Ён быў тым самым машыністам электрычкі «Аляхновічы-Менск», якую праз няправільныя паказанні святлафора на станцыі Крыжоўка 2 траўня 1977 года пратараніў пасажырскі цягнік «Гародня-Орша». На месцы загінулі 19 чалавек, яшчэ больш за 80 чалавек былі параненыя.

У пачатку 1990-х, пасля смерці жонкі, былы машыніст стаў жыць з іншай жанчынай. А кватэру на Брэсцкай наважыў прадаць. Пакупнікамі ў выніку стала сям'я расейцаў Ракаўчукоў, якая раней жыла ў Мазыры.

Дзмітрый быў вайскоўцам у адстаўцы, ягоная жонка Святлана - выкладчыкам фізкультуры. З імі жыў і ейны сын ад першага шлюбу Аляксандр. Культурная сям'я, кажуць жыхары пад'езда. Праўда, з суседзямі знізу і зверху было некалькі канфліктаў - у 66-й часам было шумна.

Так ці інакш, у сваёй новай кватэры яны пражылі крыху больш за 10 гадоў, пакуль Святлана, хворая гіпертаніяй, не памерла. «Інсульт», - растлумачыў суседзям Дзмітрый. Яе цела крэмавалі, пасля чаго сын Аляксандр паехаў хаваць яе на радзіму, у Расею.

Неўзабаве пасля яго вяртання, 23 верасня 2012 г. суседзі ўбачылі кватэру апячатанай. Здзіўленым жыхарам міліцыянты паведамілі, што 63-гадовы Дзмітрый Ракаўчук быў забіты.

Паводле інфармацыі міліцыі, мужчыну забіў ягоны 22-гадовы пасынак. Падчас нейкай спрэчкі пачалася бойка. Пасынак паспеў нанесці айчыму смяротны ўдар па галаве. Аляксандр быў арыштаваны, і з таго часу знаходзіцца ў следчым ізалятары.

У канцы студзеня павінен адбыцца суд над ім - папярэдняе пасяджэнне было перанесенае праз хваробу суддзі. Суседзі перакананыя, што прычынай канфлікту стала кватэрнае пытанне. Дзмітрый расказваў ім, што Аляксандр неаднаразова патрабаваў прадаць кватэру і аддаць яму ягоную дзель. Дамовіцца яны так і не здолелі ...

Пра тое, што ў Дзмітрыя існаваў тэстамэнт, і пра яго змест, стала вядома з паведамлення прэс-службы Аляксандра Лукашэнкі. Выяўляецца, Ракаўчук дадаткова адзначыў, што хоча перадаць сваю кватэру ва ўласнасць дзяржавы.

У яго была дачка ад першага шлюбу, але стасункі яны не падтрымлівалі. Суседка Дзмітрыя ўспамінае, што ён казаў ёй пра складзены тэстамэнт і пра яго змест, аднак яна падумала, што той жартуе. Ракаўчук-старэйшы паклапаціўся, каб кватэра не дасталася пасынку.

Так ці інакш, неўзабаве на Брэсцкай, 76-66 з'явяцца новыя жыхары. На распараджэнне Лукашэнкі, кватэру атрымае сям'я інвалідаў або шматдзетная сям'я.