Жыхары вёскі на радзіме Дзяржынскага сядзяць без вады і цяпла

Але скардзіцца баяцца.

«З 26 снежня і да сёння ў нашым невялікім мястэчку Цеснавая ў Стаўбцоўскім раёне людзі сядзяць без вады і цяпла, - напісаў на сваёй старонцы ў Facebook жыхар вёскі Аляксандр Кісялёў. - Уначы захутваемся ў 3-4 коўдры, але ўсё роўна мерзнем. Вось і дзеці пайшлі пасля вакацый у школу, але ў класах толькі блізка што 12 градусаў вышэй за нуль. Усе баяцца пісаць у СМІ - бо гэта вёска, людзі будуць скоса глядзець ...»

Карэспандэнт TUT.BY неадкладна адправіўся ў дарогу, каб пагутарыць з жыхарамі вёскі Цеснавая. Першым нам сустрэўся той самы студэнт Аляксандр Кісялёў, які выйшаў на вуліцу, каб набраць вады ў пластыкавыя бутэлькі, бо водаправод дома не працуе.

А няма вады - значыць, няма чаго заліць і ў ацяпляльную сістэму. Як вынік - няма і цяпла. Аляксандр запрасіў нас зайсці да яго, дзе градуснік гэтай зімой паказвае не больш за +12 градусаў.

Да нашай гутаркі тут жа далучыліся і суседзі. З іхных словаў, праблема з водазабеспячэннем і ацяпленнем у Цеснавая - застарэлая, доўжыцца ўвесь гэты жах ўжо блізка што 20 гадоў. Прычына - ці то ў няправільна пракручанай свідравіне, ці то ў сістэмных дэфэктах водаправода. Са слоў жыхароў, скардзіцца мясцовым уладам у асобе старшыні сельсавета цалкам бессэнсоўна.

Выпала нам пабываць і ў мясцовай школе. На шчасце, тут ацяпленне намаганнямі самаадданых сантэхнікаў сяк-так, але зарабілі: тэмпературу ў класах на першым паверсе ўчора, 11 студзеня, здолелі падняць ажно да ... 12 градусаў цяпла. Праверыць гэта было не складана - у кожным класе вісяць градуснікі.

А вось на другім паверсе ўсё аказалася куды горш. Паводле градусніка, тэмпература ў класах тут складае ўсяго ... 3 градусы цяпла! Пра якія ўрокі ў такіх умовах можа ісці гаворка?

Зрэшты, як паведамілі самі педагогі, рызыкаваць здароўем дзяцей яны не могуць, таму з халодных класаў хлопчыкаў і дзяўчынак пераводзяць у тыя, дзе тэмпература вышэйшая. А на ўроках дазваляюць не здымаць вопратку.

Цікавую драбніцу, пра якую мясцовыя жыхары зусім не захацелі гаварыць з гасцямі, выпадкова ўдалося даведацца толькі перад самым ад'ездам. Цеснаўская сярэдняя школа не проста так носіць імя Ф.Э.Дзяржынскага: адзін з правадыроў рэвалюцыі і будучы заснавальнік ЧК нарадзіўся менавіта ў гэтых краях. А апякуецца школай Камітэт дзяржаўнай бяспекі Беларусі. І дзеці, і педагогі сваімі шэфамі задаволеныя - маўляў, яны часта і ахвотна дапамагаюць навучальнай установе.

Ці дапамогуць шэфы ў развязанні праблемы з ацяпленнем - пакуль невядома, але мясцовыя жыхары паскардзіцца ім пакуль не наважыліся.