«Беларусьфільм» баіцца экранізаваць «Каласы пад сярпом тваім»

На кінастудыі адмову тлумачаць дрэнным сцэнарам, сцэнарыст мяркуе, што чыноўнікаў напалохалі бел-чырвона-белыя сцягі ў руках паўстанцаў.

Здымаць фільм па кнізе Уладзіміра Караткевіча «Каласы пад сярпом тваім» «Беларусьфільм» не будзе. Прычына, тлумачыць «Еўрарадыё» начальнік аддзела рэалізацыі і рэкламы кінастудыі Міхаіл Кацюшэнка, у сцэнары.

«Я і сам глядзеў сцэнар... Гэта не сцэнар, а, скажам так, проста пераказ рамана. Проза адрозніваецца ад сцэнара, ведаеце. Таму, так бы мовіць, і не сышліся», - кажа Катюшенко.

Над новым сцэнарам, як адзначае суразмоўца, ніхто не працуе. Таму саму ідэю фільма па гэтым рамане на «Беларусьфільме» адклалі «ў запаснікі».

Названая супрацоўнікам кінастудыі прычына замаразкі праекта здзівіла сцэнарыста Аляксандра Качана.

«Сцэнар разглядалі некалькі гадоў назад - на пасяджэнні Экспертнага савета пры Міністэрстве культуры і на «Беларусьфільме». Сцэнар быў прыняты і аплочаны. У тым ліку, спачатку была чатырохсерыйная версія, а потым - пракатная поўнаметражная. Абодва сцэнары былі прынятыя!» - распавёў Качан.

Дарэчы, Аляксандр Качан вядомы па нашумелых фільмах «Акупацыя. Містэрыі» і «Масакра». І таму падазраваць яго ў няведанні таго, як пішуцца сцэнары, не прыходзіцца. У самога сцэнарыста дзве версіі замаразкі праекта. Першая - у кінастудыі сёння банальна няма грошай на здымку такога буйнамаштабнага праекта.

«Калі мы абмяркоўвалі сцэнар з былым міністрам Латушкам, гэта непасрэдна ад яго быў такі заказ, выглядала інакш сацыяльная і ідэалагічная атмасфера ў краіне. Фільм задумваўся ў іншай сацыяльнай атмасферы, чым пануе ўжо некалькі гадоў у Беларусі. Таму я не здзіўлены цалкам тым, што яго адклалі. І быў бы здзіўлены, калі б гэты фільм цяпер стаў рэалізоўвацца - цяпер гэта за дзяржаўныя грошы наўрад ці будуць здымаць», - кажа Качан.

Сапраўды, згодна са сцэнарам, паўстанцы павінны былі змагацца за свабоду краіны пад бел-чырвона-белымі сцягамі, ключавым момантам у фільме з'яўляецца супрацьстаянне з Расейскай імперыяй. А таксама павінна была захавацца галоўная ідэя рамана «Каласы пад сярпом тваім» - пошук страчанай самасвядомасці беларусаў.

На думку Качана, усё вышэйпералічанае ніякай небяспекі існуючай уладзе ў сабе не нясе, як і ніякай «падрыўной» ідэалогіі. Таму, лічыць сцэнарыст, хутчэй за ўсё, новае кіраўніцтва «Беларусьфільма» і Мінкульта проста перастрахоўваецца і «дзьме на ваду». Гэта калі не лічыць, што з рэжысёрам для фільма адразу жа паўсталі праблемы - міністр Павел Латушка бачыў ім Мікалая Пінігіна, а той дзеля працы над фільмам пакідаць тэатр адмовіўся.

За тлумачэннямі прычынаў адмовы здымаць «Каласы пад сярпом тваім» радыё звяртаецца ў Дэпартамент па кінематаграфіі Мінкульта. Але там катэгарычна адмаўляюцца ад якіх-небудзь каментароў. Праўда, адзін з чыноўнікаў агучыў версію, што прычына ў... паляках. Маўляў, планавалася здымаць фільм сумесна з польскімі кінематаграфістамі, за «сумесныя» грошы, але дамоўленасці дасягнуць не ўдалося.

Цікава: ніхто з суразмоўцаў ні слова не сказаў пра тое, што сцэнарысту пажадана было б вярнуць грошы за «лажовы» сцэнар.

Дарэчы кажучы, ад экранізацыі твораў Караткевіча на «Беларусьфільме» не адмаўляюцца. Паводле слоў Міхаіла Кацюшэнкі, у наступным годзе плануецца прыступіць да здымак па рамане «Чорны замак Альшанскі». Між тым, фільм па гэтым рамане Уладзіміра Караткевіча ўжо быў зняты «Беларусьфільмам» - у 1984 годзе рэжысёрам Міхаілам Пташуком.