У Пакістане выдадзены ордэр на арышт прэм'ер-міністра

Вярхоўны суд Пакістана выдаў ордэр на арышт прэм'ер-міністра краіны Раджы Первеза Ашрафа і яшчэ 15 чыноўнікаў, якіх абвінавачваюць у карупцыі.

Сцвярджаецца, у прыватнасці, што Ашраф у 2010 годзе, знаходзячыся на пасадзе міністра водных рэсурсаў і энергетыкі, браў хабары ў абмен на адабрэнне розных энергетычных праектаў, паведамляе BBC.

Цяперашні прэм'ер усе абвінавачванні ў свой адрас адмаўляе.

На думку аналітыкаў, нягледзячы на судовае рашэнне, наўрад ці адразу ўдасца зняць Ашрафа з пасады.

Раней папулярны пакістанскі багаслоў Тахір Кадры ўзначаліў шматтысячную маніфестацыю ў Ісламабадзе, удзельнікі якой патрабавалі адстаўкі ўрада, узмацнення барацьбы з карупцыяй і рэформы выбарчага заканадаўства.

Пакістанскае тэлебачанне паказала, як пратэстоўцы радуюцца і апладыруюць, даведаўшыся пра рашэнне суда.

Услед за папярэднікам?

Пакуль незразумела, ці сталі выдадзеныя ордэры прамым следствам акцыі ў пакістанскай сталіцы, але многія эксперты адзначаюць, што Кадры лічыцца ў краіне важкай фігурай і карыстаецца падтрымкай многіх прадстаўнікоў судовых і сілавых структур.

Адносіны паміж урадам, уплывовай ваеннай верхавінай і прадстаўнікамі вышэйшай заканадаўчай улады краіны ў апошнія гады складваліся вельмі напружана.

Папярэдніка Ашрафа на пасадзе прэм'ера, Юсуфа Рэзу Гілані, у чэрвені мінулага года адхіліў ад пасады Вярхоўны суд Пакістана.

Гілані быў прызнаны вінаватым у тым, што вырашыў не праводзіць антыкарупцыйнае расследаванне ў дачыненні да прэзідэнта краіны Асіфа Алі Зардары.

Палітолагі загадзя прадказвалі, што знаходжанне ва ўладзе Раджы Первеза Ашрафа таксама не абыйдзецца без гучных скандалаў.