Тэракт у сірыйскім універсітэце: 80 загінулых

Ва ўніверсітэце горада Алепа на поўначы Сірыі прагрымелі два выбухі.

Па дадзеных уладаў і сірыйскіх антыўрадавых актывістаў, загінулі больш за 80 чалавек, перадае ВВС.

Паводле паступаючых паведамленняў, выбухі адбыліся на тэрыторыі паміж універсітэцкім інтэрнатам і архітэктурным факультэтам.

Сірыйскі цэнтр назірання за выкананнем правоў чалавека, які базуецца ў Велікабрытаніі, паведамляе пра 83 загінулых. Губернатар Алепа заявіў, што ахвярамі выбухаў сталі 82 чалавекі.

Дзяржаўнае тэлебачанне Сірыі абвясціла, што «тэрарысты запусцілі ракеты" па тэрыторыі ўніверсітэцкага кампуса. Паводле прадстаўнікоў апазіцыі, выбухі сталі вынікам абстрэлу з паветра.

Алепа - найбуйнейшы горад Сірыі - стаў сцэнай разлютаваных баёў паміж урадавымі сіламі і паўстанцамі. Ні адзін з бакоў да гэтага часу не змог прымусіць суперніка адступіць.

Першы дзень сесіі

На кадрах з Алепа відаць, што фасад аднаго з універсітэцкіх інтэрнатаў цалкам разбураны.

Абгарэлыя аўтамабілі і целы ляжаць на вуліцы, а людзі ў слязах спрабуюць знайсці прытулак у суседнім будынку.

Па дадзеных губернатара Алепа Махамеда Вахіда Акада, параненыя больш за 160 чалавек.

Акад вінаваціць у тым, што здарылася, «тэрарыстаў», мэтай якіх былі студэнты ў першы дзень сесіі.

Апазіцыянеры сцвярджаюць, што ўрадавыя войскі накіравалі авіяцыю, каб нанесці ўдары па кампусе.

На відэа, апублікаваным у інтэрнэце апазіцыйнай групай «Мясцовыя каардынацыйныя камітэты», студэнты хутка адыходзяць ад будынка ўніверсітэта пасля першага выбуху. Пры гуках другога выбуху камера трасецца, і людзі пачынаюць бегчы.

Студэнт, які назваўся Абу Тайемам, распавёў, што «ваенным самалётам гэтага злачыннага рэжыму ўсё роўна, мячэць гэта, царква ці ўніверсітэт».

Раней паўстанцы ладзілі бамбардзіроўкі ўрадавых будынкаў у Алепа. У кастрычніку па меншай меры 34 чалавекі загінулі ў выніку серыі выбухаў на галоўнай плошчы горада.