У Гродне пасажыраў штрафуюць за багаж у 5 кілаграмаў

Карыстальнікі гродзенскага форуму пачалі скардзіцца на тое, што кантралёры штрафуюць людзей за тое, што тыя не набылі квіткі для свайго багажу вагой больш за пяць кілаграмаў.

Пра гэта піша «Твой стыль».

«Сёння пры мне вывелі з тралейбуса мужчыну, які аплаціў праезд, але вёз з сабой звычайны пакет з прадуктамі. Таму яго прымусілі плаціць штраф 20 000 рублёў. Растлумачце, на якой падставе дзейнічалі кантралёры і як яны вызначылі, што багаж важыць больш за 5 кг, а не 4,5 або 4,8?»- напісаў Premier.

«Учора з сястрой трапілі на штраф. Ехалі з рынку. Купілі там сумку і тры курыцы па кілаграме. Кантралёр на вока вызначыла габарыты і вагу сумкі і сказала плаціць штраф, пры гэтым вырваўшы пашпарт з рук у сястры», - падзялілася карыстальнік форуму TaNyushka.

Людзі задаюцца пытаннямі: чаму пачалі штрафаваць за безбілетны перавоз сумак, ці законныя гэтыя «новаўвядзенні»?

У выпісцы з Правілаў карыстання гарадскім пасажырскім транспартам у Гродне ёсць такі артыкул: «Пасажыр мае права бясплатна перавозіць адно месца маламернай ручной паклажы і такія асабістыя рэчы, як насімае адзенне, парасон, тэлефон мабільнай сувязі, фотаапарат, партатыўная відэакамера, кій, а таксама адну сумку, тэчку або мяшок для прадметаў асабістага ўжытку і дакументаў памерамі да 40x20x10 см або сумай трох вымярэнняў не больш за 70 см і масай не больш за 5 кг».

Што маецца на ўвазе пад «маламерным багажом»? Згодна з пастановай Савета міністраў РБ ад 30 чэрвеня 2008 года № 972, «маламерны багаж або ручная паклажа - гэта прадметы, якія маюць памеры не больш за 60×40×20 см або суму трох вымярэнняў не больш за 120 см і масай не больш за 20 кг».

Значыць, 20 кг маламернага + 5 кг на асабістыя рэчы = 25 кг дазволенага «безбілетнага» багажу.

Спецыяліст аддзела прамысловасці, транспарту, сувязі і паслуг гарвыканкама пацвердзіла, што кантралёры не маюць права выпісваць штраф на багаж, які важыць больш за 5 кг.

Тады адкуль з'явіліся аб'явы ў грамадскім транспарце і, як следства, грашовыя пакаранні? Чым кіруюцца кантралёры, штрафуючы людзей?

Намеснік начальніка ўпраўлення тралейбуснага дэпо Андрэй Эйсмант, адказваючы на гэтыя пытанні, некалькі разоў прачытаў тую ж выпіску з Правілаў карыстання пасажырскім транспартам і асабліва звярнуў увагу на паказанае значэнне - 5 кг.

Ён пацвердзіў той факт, што кантралёры маюць права штрафаваць гаспадароў «звыхпяцікілаграмовых» валізак. «Правілы праезду звычайна вісяць каля кабіны кіроўцы, і пасажыры абавязаныя азнаёміцца са сваімі правамі і абавязкамі», - сказаў Эйсмант.

Атрымліваецца, што аддзел транспарту гарвыканкама штрафаваць забараняе, тралейбуснае дэпо, наадварот, дазваляе. З размовы з гродзенскімі кантралёрамі стала зразумела, што існуюць адмысловыя штрафныя квіткі за неналежны правоз багажу.

Па словах кантралёраў, раней на чацвёртую частку не звярталі ўвагі, а цяпер, ва ўмовах рынку, пытанне паўстае больш востра.

«Багаж займае месца, дзе мог бы стаяць чалавек. Мы пакуль не штрафуем, а ёсць калегі, якія штрафуюць. Мы папярэджваем: раім узяць сумкі на рукі, каб не перашкаджалі праходу», - кажуць кантралёры.