Аналітыкі з «лужыны»
46
14:08, — Палітыка
Сакрэтныя і паўсакрэтныя місіі ў апошнюю дыктатуру Еўропы - гэта трывожны сігнал.
Пра гэта ў інтэрв'ю charter97.org заявіў лідэр грамадзянскай кампаніі «Еўрапейская Беларусь», экс-кандыдат у прэзідэнты Андрэй Саннікаў, каментуючы ўчорашнюю сустрэчу Лукашэнкі з амерыканскімі палітолагамі.
«Варта нагадаць, што гэтыя ж аналітыкі, па меншай меры, двое з іх - Сокар і Іофе - прыязджалі і сустракаліся з дыктатарам напярэдадні прэзідэнцкіх выбараў 2010 года, а затым актыўна распаўсюджвалі на Захадзе лукашэнкаўскую прапаганду ў сваіх матэрыялах. Тады са сваімі прагнозамі і ацэнкамі сітуацыі яны селі ў глыбокую лужыну. Мабыць, цяпер яны вырашылі з гэтай лужыны працягнуць пачатае, - лічыць палітык. - Візіт цынічны, іх нават складана назваць прадстаўнікамі амерыканскай аналітыкі, паколькі людзі пераследуюць нейкія свае мэты і зноў рэанімуюць спробы «адбельвання» дыктатуры. Думаю, што дыктатура выкарыстоўвае тыя ж напрацоўкі, якія нязменна выцягваюцца на свет, калі адносіны і з Усходам, і з Захадам ў рэжыму Лукашэнкі горш няма куды, а грошы патрэбныя, як ніколі. У Расеі выпрошваюць грошы пад абяцанні вечнай дружбы, а ў Захаду - пад стогны аб жорсткім ціску з боку Расеі».
«Сёння пасля тых рэпрэсій, якія пачаліся ў 2010 годзе і працягваюцца да гэтага часу, пры наяўнасці такой колькасці палітвязняў, пасля забойства двух маладых людзей за выбух у метро, у віну якіх ніхто не верыць, «адбяліць» гэты рэжым на Захадзе немагчыма, а падобныя спробы толькі нашкодзяць Беларусі», - упэўнены Саннікаў.
На думку лідэра «Еўрапейскай Беларусі», «сакрэтныя і паўсакрэтныя місіі ў апошнюю дыктатуру Еўропы, якія пачасціліся ў апошні час, - гэта трывожны сігнал. Гэта азначае, што ціск для вызвалення палітвязняў з боку міжнароднай супольнасці аслаб або свядома памяншаецца. А дамагчыся гэтага вызвалення можна толькі моцнай прынцыповай пазіцыяй, а не чарговым гандлем з дыктатурай, якая ніколі не трымае сваё слова».
Нагадаем, што 21 студзеня Лукашэнка сустрэўся з чатырма амерыканскімі палітолагамі. На сустрэчы прысутнічаў Глен Говард - прэзідэнт Jamestown Foundation, Улад Сокар з гэтага ж фонду, Януш Бугайскі з Цэнтра стратэгічных і міжнародных даследаванняў і Рыгор Іофе, прафесар Рэдфардскага ўніверсітэта.
Напісаць каментар (46)
Навіны
па тэме
Экспарт
Новости партнеров
