У Піліпца былі змоўшчыкі сярод чыноўнікаў

Некалькі службовых асоб УСК Гомельскага гарвыканкама прызнаныя падазраванымі па справе былога мэра Гомеля Віктара Піліпца.

Пра гэта паведаміў сёння старшыня Следчага камітэта Беларусі Валянцін Шаеў, перадае БелТА.

«Акрамя Піліпца, прыцягнутыя ў якасці абвінавачаных і прызнаныя падазраванымі некалькі службовых асоб унітарнага камунальнага прадпрыемства «УКБ Гомельскага гарвыканкама», некаторыя іх сваякі і знаёмыя. У цяперашні час следствам правяраюцца дамовы долевага будаўніцтва, якія заключаліся гэтым УКСам, дэталёва даследуюцца абставіны размеркавання жылля. Тэрмін следства падоўжаны да сакавіка 2013 года», - сказаў Валянцін Шаеў.

Як паведамлялася раней, былы мэр Гомеля, які займаў затым пасаду намесніка гендырэктара ўнітарнага прадпрыемства «Гомельаграпрампроект» Віктар Піліпец быў затрыманы 19 верасня 2012 ў рамках расследавання крымінальнай справы ў дачыненні да службовых асоб УКБ Гомельскага гарвыканкама. Яго дзеянні былі кваліфікаваныя па ч.3 арт.426 КК Беларусі (перавышэнне ўлады або службовых паўнамоцтваў).