Беларускія чыноўнікі могуць папоўніць «спіс Магніцкага»
19- 28.01.2013, 8:02
Сэнатары ЗША гатовыя пашырыць сферу ўжывання «закона Магніцкага».
Санкцыі могуць быць ужытыя і ў дачыненні да чыноўнікаў Украіны і Беларусі, піша «Росбалт».
Былы ўкраінскі дэпутат Астап Семерак у інтэрв'ю «Зеркало недели» паведаміў, што першапачаткова Сэнат ЗША меў намер распаўсюдзіць дзеянне гэтага закона на ўсіх чыноўнікаў усялякай краіны свету, якіх падазраюць у сур'ёзных парушэннях правоў чалавека. Аднак ім давялося звузіць спіс з суб'ектыўных прычын: шмат якія сярэднеазіяцкія краіны з'яўляюцца важнымі партнёрамі ЗША ў афганскай кампаніі. Такім чынам, для Злучаных Штатаў найбольш мэтазгодна ўжыць захады супраць дзяржаўных службоўцаў Украіны, Расеі і Беларусі.
Акрамя гэтага, Семерак адзначыў, што ў падыходзе амерыканцаў да «закону Магніцкага» адбылася эвалюцыя. Замест спісу канкрэтных асобаў быў прапісаны спіс крытэраў, парушэнне якіх прычыняецца да санкцый. Яны апісваюць дзеянні або бяздзейнасць прадстаўнікоў улады, з прычыны якіх правы і свабоды той ці іншай асобы значна абмяжоўваюцца.
«Так, цяпер разглядаецца пытанне аб падпаданні пад гэтыя крытэры ўсіх дэпутатаў Дзярждумы РФ, якія галасавалі за закон аб забароне ўсынаўлення расейскіх дзяцей амерыканцамі», - заявіў Семерак.
Палітык мяркуе, што ўкраінскія і беларускія чыноўнікі могуць папоўніць «спіс Магніцкага» ўжо ў гэтыя паўгода.
Амерыканскі закон уводзіць візавыя санкцыі ў дачыненні да расейцаў, якія маюць дачыненне, на думку кангрэсмэнаў, да парушэнняў правоў чалавека, у прыватнасці да загубы ў 2009 годзе ў следчым ізалятары кансультанта інвестфонда Hermitage Capital Management Сяргея Магніцкага.
Закон, прыняты Дзярждумай у адказ на амерыканскі «акт Магніцкага» і вядомы як «закон Дзімы Якаўлева», які забараняе ўсынаўленне сірот грамадзянамі ЗША, увайшоў у дзеянне з 1 студзеня 2013 года. Законам, у прыватнасці, уводзіцца забарона на ўсынаўленне расейскіх дзяцей грамадзянамі ЗША, а таксама на дзейнасць на тэрыторыі Расеі органаў і арганізацый для падбору і перадачы дзяцей амерыканцам.