28 сакавiка 2024, Чацвер, 22:53
Падтрымайце
сайт
Сім сім,
Хартыя 97!
Рубрыкі

«Белсат» падарыў Давыдзьку спадарожнікавую антэну

20
«Белсат» падарыў Давыдзьку спадарожнікавую антэну

Супрацоўнікі тэлеканала «Белсат» перадалі спадарожнікавую антэну для генеральнага дырэктара БТ Генадзя Давыдзькі.

Прадстаўнік тэлеканала Міхаіл Янчук сказаў журналістам, што падарыць Давыдзьку магчымасць глядзець польскі тэлеканал яны наважылі пасля ягонага выступу ў Інстытуце журналістыкі БДУ на мінулым тыдні, піша БелаПАН.

«Мы даведаліся, што кіраўнік Белтэлерадыёкампаніі не мае магчымасці глядзець наш канал, - сказаў Янчук. - Але пры гэтым ён асуджае канал за яго дзейнасць. Таму, каб ягоныя словы не былі неабгрунтаванымі, мы наважылі сёння ўручыць яму талерку, каб ён зрэдку мог глядзець наш канал і сфармаваць аб ім сваё аб'ектыўнае меркаванне».

Янчук працытаваў словы Давыдзькі з ягонага выступлення перад студэнтамі-журналістамі: «Калі чалавек прапагандуе і падтрымлівае ідэі, за якія больш заплацяць, як асоба, а можа, і як фізічнае цела, чалавек доўга не пражыве, таму што ўнутраны разрыў паміж любоўю і патрэбай - гэта духоўная прастытуцыя, страшней нічога не бывае».

«Я хацеў бы, каб наша талерка стала першым крокам да ліквідацыі гэтага разрыву», - адзначыў Янчук.

Адказваючы на пытанне, ці не будзе такі падарунак уважацца за замежную інвестыцыю у развіццё БТ, Янчук выказаў надзею, што кошт спадарожнікавай талеркі і рэсівера не перавысіць грашовага ліміту, на суму якога можна прымаць падарункі беларускім чыноўнікам.

Пасля таго як абсталяванне было пакінутае ў будынку БТ, Янчук выказаў надзею, што «з часам беларуская дзяржаўная тэлевізія ператворыцца ў беларускую грамадскую тэлевізію, якая будзе служыць інтарэсам не толькі адной сям'і або вузкіх ўладных колаў, а ўсяму народу».

«Гэта будзе тэлевізія, якая не будзе хлусіць свайму народу, пра якую не будуць распавядаць анекдоты: «Хачу жыць у краіне, якую паказваюць на БТ». Калі з наступнага выступу Давыдзькі мы даведаемся, што ён будзе крытыкаваць Белсат аб'ектыўна, то тады можна казаць, што акцыя скончылася паспяхова», - падсумаваў прадстаўнік тэлеканала.

Напісаць каментар 20

Таксама сачыце за акаўнтамі Charter97.org у сацыяльных сетках