Лукашэнку выдалілі з пляцоўкі за атаку спаборніка

У Менску распачаўся Калядны міжнародны турнір аматараў хакея.

Беларускі правадыр выйшаў на пляцоўку ў чорным шаломе, піша «Салідарнасць».

Традыцыйны турнір адкрыўся ўвечары 4 студзеня ў Палацы спорту матчам Беларусі супраць Швейцарыі. Гаспадары пляцоўкі прадказальна распляжылі спаборнікаў - 11:4.

Лік ужо на 2-й хвіліне распачаў Аляксандр Лукашэнка, які яшчэ раз патрапіў у браму спаборніка на 22-й хвіліне.

Як пішуць на форуме «Прессбола», падчас двубою Лукашэнка быў таксама выдалены з пляцоўкі - за атаку спаборніка, які не валодае шайбай.

- Гэта былі самыя спакойныя 2 хвіліны ў гісторыі суверэннай Беларусі, - жартуюць заўзятары.

Характэрна, што дыктатар гуляў у чорным шаломе, тады як ягоныя партнёры былі ў традыцыйных чырвоных.

Стаўленне беларускіх заўзятараў да спаборніцтваў вядомае. Два гады таму аб'яву аб прэзідэнцкім калядным турніры аматары хакея на «Мінск-Арэне» асвісталі.

Год таму каманда правадыра парушыла правілы спаборніцтваў. У турніры, які называюць «неафіцыйным чэмпіянатам свету сярод аматараў», у камандзе Лукашэнкі налічылі адразу 9 дзейных хакеістаў.

Ва ўчорашнім двубоі закінутай шайбай, у прыватнасці, вызначыўся форвард «Гомеля» Арцём Сянькевіч.