Галадоўка на Мазырскім НПЗ: дзень чацвёрты

Чацвёрты дзень працягваецца галадоўка лідараў пяршоўкі Беларускага незалежнага прафсаюза на Мазырскім НПЗ.

Юрый Швец і яго калега Васіль Альхоўскі ўжо 4 дні не былі дома.

- З 8 да 18, мы на працы, выконваем свае абавязкі, калі працоўны дзень заканчваецца - ідзем да машыны на стаянцы каля завода, і начуем у ёй, - расказвае «Салідарнасці» Юрый Швец. - Усё навідавоку, прадпрыемства працуе кругласутачна, людзі пастаянна ходзяць праз прахадную. Можа хтосьці і думае, што ў мяне поўны бардачок снікерсаў, але гэта не так.

Прафсаюзны актывіст адзначае, што першая рэакцыя на галадоўку ўжо была. Праўда, не з боку адміністрацыі прадпрыемства.

- Учора стала вядома, што ў канцэрне «Белнафтахім» вырашылі перанесці сустрэчу з прадстаўнікамі незалежнага прафсаюза з 16 на 18 кастрычніка, - кажа Юрый Швец. - Яны збіраюць усе дакументы, кажуць, што хочуць вывучыць іх дасканала, каб разабрацца ў нашых праблемах. Прапанавалі нам скласці спісы тых, хто паедзе на сустрэчу ў Менск.

Пакуль дакументы вывучаюць, актывісты працягваюць галадоўку.

- Літаральна 10 хвілін таму падыходзіла работніца завода, пыталася, ці можна галадаць у нашу падтрымку. Я ёй адказаў, што мяне прыраўнуе жонка, і так чацвёрты дзень дома не быў, - жартуе Юрый Швец.

Пра самаадчуванне актывіст кажа скупа.

- Адчуваю сябе нармальна. Фізічна рэсурсы яшчэ засталіся і можна працягваць галадоўку, хоць калегі прапаноўвалі прыпыніць яе на час, пакуль пытанне разглядаецца на ўзроўні «Белнафтахіма». Аднак цяжка маральна ўсведамляць, што адміністрацыя прадпрыемства паводзіць сябе так у адносінах да работнікаў, выкарыстоўваючы працоўнае заканадаўства ў сваіх інтарэсах для таго, каб распраўляцца з непажаданымі. Будзем галадаць, пакуль нас не пачуюць, - падсумаваў актывіст.

Нагадаем, што сваёй галадоўкай лідары пяршоўкі Мазырскага НПЗ патрабуюць спыніць супрацьзаконныя дзеянні ў дачыненні да прафсаюзнай арганізацыі БНП і яе сяброў, правесці расследаванне пяці выпадкаў звальнення работнікаў завода з выкарыстаннем кампетэнтных незалежных спецыялістаў і адмяніць дысцыплінарныя спагнанні і іншыя меры ўздзеяння, прынятыя да іх.

Фота: «Радыё Свабода»