23 траўня 2015, Субота, 19:26

Мая Качыянчыч: ЕЗ можа падоўжыць санкцыі ў любы час

3

Пытанне па Беларусі не ўключана ў парадак дня Рады міністраў замежных спраў краін ЕЗ.

Яго пасяджэнне пройдзе 21 кастрычніка ў Люксембургу, паведаміла Мая Качыянчыч, прэс-сакратар вярхоўнага прадстаўніка ЕЗ па пытаннях знешняй палітыкі і палітыкі бяспекі Кэтрын Эштан, перадае БелаПАН.

Пры гэтым яна ўдакладніла, што рада «можа прыняць рашэнне, якое будзе аформлена ў пісьмовым выглядзе, у любы час».

31 кастрычніка мінае тэрмін дзеяння санкцый Еўразвяза ў дачыненні да беларускіх уладаў. Да гэтай даты кіраўнікі МЗС краін ЕЗ павінны прыняць рашэнне аб падаўжэнні або непадаўжэнні абмежавальных мер у дачыненні да афіцыйнага Менска.

У цяперашні час пад візавыя і эканамічныя абмежаванні ЕЗ падпадаюць 243 беларускіх чыноўніка, у тым ліку Лукашэнка. Санкцыі супраць уладаў Беларусі ўведзеныя з-за сістэматычнага парушэння імі правоў чалавека і рэпрэсій супраць апазіцыі і грамадзянскай супольнасці.

Нагадаем, праваабарончыя групы са Швецыі, Чэхіі, Германіі, Эстоніі, Славакіі, Фінляндыі, Швейцарыі, Нарвегіі і Беларусі накіравалі ліст міністрам замежных спраў краін-удзельніц ЕЗ і Вярхоўнаму прадстаўніку ЕЗ па замежных справах і палітыкі бяспекі Кэтрын Эштан, у якім гаворыцца, што санкцыі ў іх сённяшнім выглядзе не працуюць. «Толькі паслядоўная стратэгія ЕЗ з выкарыстаннем эфектыўных абмежавальных мер можа прывесці да станоўчых зменаў у Беларусі і, у першую чаргу, да вызвалення і рэабілітацыі ўсіх палітычных зняволеных». Ліст таксама падпісаны кандыдатам у прэзідэнты на выбарах 2010 года, былым палітвязнем Андрэем Саннікавым, лідарам грамадзянскай кампаніі «Еўрапейская Беларусь».

падзяліцца