Маёра судзяць за адмову здаваць залік па ідэалогіі

Памежкамітэт рыхтуе паказальны суд над маёрам Аляксеем Касцюковым.

У пачатку верасня ў Смаргонскім памежатрадзе прымалі штогадовыя залікі па фізічнай падрыхтоўцы і па ідэалагічнай працы. Супрацоўнік 3-га аддзела службы аператыўнай дзейнасці маёр Аляксей Касцюкоў ад праходжання залікаў адмовіўся піша «Белорусский партизан».

9 лістапада ў яго заканчваецца кантракт, які ён вырашыў не падаўжаць. Маёр ужо прайшоў атэстацыйную камісію перад звальненнем, якая дазваляла яму звольніцца, і збіраўся спакойна пакінуць шэрагі памежнікаў. Ад выканання сваіх службовых Аляксей Касцюкоў, вядома ж, не адмаўляўся, але залік па ідэалогіі вырашыў праігнараваць, за што атрымаў строгую вымову ад камандзіра.

Здавалася б, на гэтым непрыемнасці для афіцэра, які сабраўся на дэмбель, павінны былі скончыцца. Аднак праз два тыдні пасля інцыдэнту камандзір вайсковай часткі 2044 палкоўнік Ляўда распачаў супраць маёра Касцюкова крымінальную справу. Маёра абвінавацілі ў здзяйсненні воінскага злачынства - артыкул 438, ч.1 Крымінальнага кодэкса Беларусі.

Справу перадалі ў Следчы камітэт па Смаргоні. Маёра ўжо некалькі разоў выклікалі на допыты. Паказанні на Касцюкова даў яго непасрэдны кіраўнік - начальнік службы аператыўнай дзейнасці маёр Страпко. Гэта менавіта той маёр Страпко, які падазраваўся ў гвалтоўных дзеяннях сэксуальнага характару супраць жыхаркі Астраўца. Нагадаем, што 34-гадовая жыхарка райцэнтра Марына Вінсло другі год практычна ў адзіночку вядзе непрымірымую барацьбу з беларускай праваахоўнай сістэмай. Яна сцвярджае, што яе спрабаваў згвалціць маёр Страпко, а ў выніку яна сама ператварылася ў злосную хуліганку.

У маёра Страпко пастаянна ўзнікалі канфлікты з падначаленым - маёрам Касцюковым. Апошні крытыкаваў Страпко за жорсткія і часта на мяжы закона дзеянні аператыўнікаў памежатрада супраць літоўскіх грамадзян і мясцовых жыхароў. Цяпер Страпко зможа адпомсціць дзёрзкаму маёру.

На мінулым тыдні ўжо прыязджаў з Менска міжгарнізонны ваенны пракурор Васілюк. Па чутках, але абвясціў, што суд супраць маёра Касцюкова будзе выязным і паказальным. Прыкладна, раз у 2 гады ў памежным камітэце ладзяць паказальную лупцоўку каго-небудзь з афіцэраў у выхаваўчых мэтах. Тут жа яны хочуць раздуць справу да памераў здрады Радзіме, таму што маёр замахнуўся на святое - экзамен па ідэалогіі. У выніку, камандзіры часткі пазбавяцца ад свавольнага маёра, а чэкісты з пракурорамі здадуць справаздачу аб тым, што задушылі ў зародку спробу дзяржаўнай здрады. Абсурд, скажыце? Вядома, але колькі мы за апошнія гады бачылі з вамі абсурдных сітуацый, якія ламалі рэальныя лёсы.

Журналісты знайшлі маёра Аляксея Касцюкова, які пакуль устрымліваецца ад каментароў. Ён лічыць сябе абсалютна невінаватым, паказвае на працэсуальныя парушэнні пры ўзбуджэнні супраць яго крымінальнай справы і кажа, што яму хочуць адпомсціць за звальненне з памежкамітэта і крытыку ў адрас маёра Страпко.

У маёра Касцюкова двое маленькіх дзяцей, жонка не працуе і глядзіць за дзецьмі, малодшаму з якіх споўнілася нядаўна 4 гады. Практычна няма шанцаў, што ў Аляксея Касцюкова атрымаецца абараніцца ад рэпрэсіўнай машыны ваеннай пракуратуры, тым больш, калі хтосьці спрабуе прывязаць да гэтай справы ідэалогію.