Прадпрымальнікі: Абстаноўка на рынках абвостраная да мяжы

Індывідуальныя прадпрымальнікі папярэджваюць улады аб сацыяльным выбуху.

Пра гэта гаворыцца ў лісце, з якім яны звярнуліся да прэм'ер-міністра Беларусі Міхаіла Мясніковіча. У дакуменце просяць даць афіцыйнае адназначнае тлумачэнне па пытанні аб умовах працягу працы індывідуальных прадпрымальнікаў на рынках і ў гандлёвых цэнтрах з 1 снежня 2013 года. Ліст падпісаны лідарам РГА «Перспектыва» Анатолем Шумчанкам.

«Па словах віцэ-прэм'ера П.П.Пракаповіча, якія былі сказаныя на нарадзе 15 лістапада 2013 года, міністэрствам і ведамствам дадзеныя даручэнні аб унясенні змяненняў у пастанову Мінгандлю, Мінсельгасхарчу, Міністэрства аховы здароўя і Дзяржстандарту Рэспублікі Беларусь ад 21 чэрвеня 2013 г. №9/26/50/32, якая прадастаўляе для індывідуальных прадпрымальнікаў - плацельшчыкаў адзінага падатку магчымасць спрошчанага парадку пацвярджэння адпаведнасці тавараў лёгкай прамысловасці патрабаванням тэхрэгламенту. Гаворка ідзе пра перанос тэрміну спрошчанага парадку пацвярджэння адпаведнасці тавараў лёгкай прамысловасці патрабаванням тэхрэгламенту з 1 ліпеня 2014 года на 1 снежня 2013 года. Таксама, віцэ-прэм'ерам былі дадзеныя даручэнні аб унясенні змяненняў і дапаўненняў ва Указ Прэзідэнта Рэспублікі Беларусь ад 18 чэрвеня 2005 г. №285 «Аб некаторых мерах па рэгуляванні прадпрымальніцкай дзейнасці», з меркаванымі тэрмінамі ўступлення новага дакумента снежань-люты 2013 - 2014 гадоў», - нагадваюць яны.

Між тым, да 1 снежня 2013 года засталося 5 дзён, і поўнай яснасці аб умовах працы ў прадпрымальнікаў няма. Аўтары ліста кажуць, што ў выпадку выканання дадзеных даручэнняў абсалютная большасць прадпрымальнікаў плануюць спыніць сваю дзейнасць з-за немагчымасці атрымання патрэбных дакументаў на тавар, які менш праз 5 дзён стане нелегальным. У той жа час кантралюючыя органы рыхтуюцца да маштабных аперацый па праверках названых тавараў.

«Прадпрымальнікі ў існуючых умовах не змогуць як працягваць працу пад пагрозай будучых дзеянняў кантралюючых органаў, так і працягваць устаноўленыя фіскальныя адносіны з дзяржавай, якая пазбаўляе іх даходу, і тым самым крыніцы для ажыццяўлення абавязковых падатковых плацяжоў.

Паведамляем Вам, што выкананы намі маніторынг, праведзены на рынках і гандлёвых цэнтрах краіны, сведчыць аб гранiчна абвостранай абстаноўцы, якая пры працягу правядзення Урадам падобнай палітыкі ўнясення змяненняў і дапаўненняў у акты заканадаўства, пра якія сказана вышэй, немінуча прывядзе да сацыяльнага выбуху і канфрантацыі.

Беларускія прадпрымальнікі ў 21 стагоддзі не гатовыя да вяртання палітыкі «харчразвёрстак» з боку кантрольна-наглядных органаў, якая мела месца ў ліхія 90-я гады», - гаворыцца ў лісце.

Аўтары ліста лічаць мэтазгодным прыкласці ўсе намаганні для выпрацоўкі кампраміснага рашэння для малога бізнесу і ўладаў на аснове канструктыўнага перамоўнага працэсу.

На сустрэчах з органамі ўлады на месцах у рэгіёнах і сталіцы прадпрымальнікі папярэдзілі мясцовыя ўлады аб тым, што імі не будуць выплачвацца падаткі да таго часу, пакуль не будзе выразнага адказу на пытанне па якіх правілах працаваць з 1 снежня 2013 года.

Усё гэта вынік розных каментароў афіцыйных органаў улады, калі адны заяўляюць, што нічога не мяняецца ва ўмовах працы для ІП, іншыя наадварот раздаюць даручэнні. Дадзеныя непаслядоўныя дзеянні ўладаў наносяць страты бюджэту краіны і выклікаюць рост незадаволенасці насельніцтва, асабліва напярэдадні навагодніх святаў. У рамках інтэграцыйных працэсаў з Расеяй і Казахстанам урадам было падпісанае загадзя невыканальнае беларускім бокам пагадненне аб уступленні ў сілу Тэхнічнага рэгламенту бяспекі тавараў лёгкай прамысловасці», - гаворыцца ў лісце.

У мэтах вырашэння названых вышэй праблем і своечасовых выплачаных плацяжоў у бюджэт краіны з боку малога бізнесу, прадпрымальнікі просяць у тэрміновым парадку даць афіцыйны каментар пра пазіцыю ўрада па перспектывах, тэрмінах, механізмах права прымянення Тэхнічнага рэгламенту бяспекі тавараў лёгкай прамысловасці, у тым ліку магчымых зменах па пастанове ад 21 чэрвеня 2013 года № 9/26/50/32, а таксама зменах ва Указ №285.

ІП таксама прапануюць правесці пашыраную нараду з удзелам прадпрымальніцкіх структур, у тым ліку і саветаў прадпрымальнікаў з рэгіёнаў і сталіцы, з аднаго боку і ўрада з асабістым удзелам Міхаіла Мясніковіча з другога.

Нагадаем, узмоцненыя праверкі, якія суправаджаюцца канфіскацыяй тавараў з розных прычын, пачаліся на рынках Беларусі 1 лістапада. Учора стала вядома, што менскія ўлады сарвалі правядзенне 25 лістапада форуму прадпрымальнікаў, на якім ІП збіраліся абмеркаваць сітуацыю, звязаную з увядзеннем у наступным месяцы новых правілаў гандлю. Яны незадаволеныя тым, што з 1 снежня 2013 года яны не змогуць прадаваць тавары, якія не маюць дакументаў, якія пацвярджаюць іх якасць і бяспеку ў адпаведнасці з патрабаваннямі тэхнічнага рэгламенту Мытнага саюза «Аб бяспецы прадукцыі лёгкай прамысловасці».

Увядзенне патрабаванняў тэхнічнага рэгламенту Мытнага саюза ўжо выклікала пратэст. На рынках і ў гандлёвых цэнтрах Беларусі ў канцы чэрвеня - пачатку ліпеня прайшлі забастоўкі прадпрымальнікаў. Прадпрымальнікі выказалі незадаволенасць рэгламентам, заявіўшы, што ён паставіць іх на мяжу жыцця, паколькі абавязвае ажыццяўляць дарагую працэдуру сертыфікацыі тавараў лёгкай прамысловасці.