Лукашэнка вяртае пленумы ЦК КПСС

Мінімум раз на паўгода дыктатар збіраецца праводзіць рэспубліканскія нарады.

Пра гэта 10 снежня заявіў Лукашэнка на рэспубліканскай нарадзе па рашэнні праблемных пытанняў у будаўнічай галіне і ўдасканаленні работы з кіруючымі кадрамі, паведамляе БелТА.

Ён назваў сённяшняе мерапрыемства знакавай падзеяй і прызнаўся, што «яно бачыцца яму свайго роду аналагам пленума Цэнтральнага камітэта Кампартыі ў савецкія часы, калі з усіх рэгіёнаў збіраліся кіруючыя кадры і адкрыта абмяркоўвалі, сумесна вырашалі найважнейшыя пытанні жыцця грамадства».

У Беларусі выбраны фармат рэспубліканскай нарады. «Такога фармату і шырокага складу ўдзельнікаў патрабуюць як актуальнасць тэматыкі, так і неабходнасць усебаковага абмеркавання рэальнай сітуацыі ў вельмі важных сферах дзейнасці, каб дайсці да кожнага рэгіёна, кожнай арганізацыі», - растлумачыў Лукашэнка.

«Стаіць задача падняць і прапанаваць рашэнні найбольш надзённых і значных для людзей пытанняў развіцця эканомікі і грамадства не толькі на сённяшні дзень, але і ў сярэднетэрміновай перспектыве», - сказаў Лукашэнка.

Кіраўнік лічыць, што неабходна часцей, як мінімум раз на паўгода, збірацца ў такім складзе, каб на сістэмнай аснове даваць сігналы ўсяму грамадству пра праблемы, якія ўзнікаюць, і шляхі іх вырашэння. Паводле яго слоў, да гэтага часу на самым высокім узроўні не быў выпрацаваны такі фармат зносінаў кіраўніка з кіруючымі кадрамі краіны.

Падчас сённяшняй нарады ён заявіў, што ў жыллёвым будаўніцтве сфакусаваныя сур'ёзныя праблемы ўсяго будаўнічага комплексу краіны.

«Па сутнасці, большасць праблем стварылі самі сабе кіраўнікі, праекціроўшчыкі, будаўнікі і мы з вамі. Каб пераадолець назапашаную кучу негатыву, прыйшлося ствараць міжведамасную групу з шырокімі паўнамоцтвамі. Падкрэсліваю - міжведамасную, таму што самым негатыўным чынам на працэсах, якія адбываюцца ў будаўніцтве, адбіваліся няўзгодненасць дзеянняў, недысцыплінаванасць, узаемныя прэтэнзіі розных структур і вузкакарпаратыўныя інтарэсы», - сказаў ён.

Кошт квадратнага метра жылля і сярэднюю зарплату зраўнуюць

«Кошт квадратнага метра жылля па дзяржзамове ў 2014 годзе будзе роўны сярэднямесячнай зарплаце па краіне», - заявіў дыктатар.

Ён нагадаў, што новае будаўніцтва жылля для грамадзян, якія маюць права на атрыманне льготных крэдытаў і аднаразовых субсідый на будаўніцтва або набыццё жылых памяшканняў, будзе ажыццяўляцца толькі па дзяржаўнай замову.

«Канчатковы кошт часцяком узрастае ў разы»

Кіраўнік незадаволены «галавацяпствам» у будаўнічай галіне.

«Пачынаць будаўніцтва на голым адміністраванні, не маючы папярэдніх разлікаў эканамічнай мэтазгоднасці і эфектыўнасці ўкладанняў, злачынна», - заявіў Лукашэнка.

Закранаючы тэму планавання і абгрунтавання інвестыцый, ён падкрэсліў, што тут шмат галавацяпства:

«З-за адсутнасці папярэдняй прапрацоўкі тэхнічных і эканамічных аспектаў будаўніцтва аб'ектаў іх канчатковы кошт часцяком узрастае ў разы».

Паводле яго слоў, за прыкладамі далёка хадзіць не трэба: «узяць хоць бы дрэваапрацоўку». Там галоўная прычына праблем, па яго словах, адсутнасць папярэдняй дэталёвай прапрацоўкі абгрунтавання інвестыцый: «У выніку мадэрнізацыя асобных тэхналагічных ліній, якая планавалася спачатку, вылілася ў будаўніцтва новых прадпрыемстваў, а сума неабходных на гэта сродкаў узрасла амаль у чатыры разы».

На думку Лукашэнкі, дастаткова аналагічных бяздумных рашэнняў і ў жыллёвым будаўніцтве. У сувязі з гэтым ураду, КДК, аблвыканкамам і Менгарвыканкаму даручана з 10 снежня забяспечыць увядзенне абавязковай перадінвестыцыйнай стадыі.

«Гэта значыць, трэба падумаць, дзе будаваць і ў што гэта выльецца – які будзе кошт... Лепш мы выдаткуем час з самога пачатку, пераканаўшыся, што праект можна пачынаць, чым пасля непрадуманых рашэнняў будзем ламаць галаву, як выходзіць з тупіковых сітуацый», - заявіў ён.

«Шэраг «фірмачак» актыўна «здымае вяршкі»

Лукашэнка патрабуе навесці парадак у сферы праектавання аб'ектаў будаўніцтва ў краіне і арганізаваць эфектыўны кантроль за ўдзельнікамі рынку будаўнічых паслуг.

«Вымушаны канстатаваць, што ў праектаванні сёння поўнае бязмежжа. Мяркуйце самі: цэлы шэраг фірмачак з колькасцю некалькі чалавек актыўна «здымае вяршкі» з працэсу праектавання», - заявіў ён і даручыў забяспечыць кантроль за допускам арганізацый і спецыялістаў на рынак будаўнічых паслуг:

«Патрабую ад урада забяспечыць ўвядзенне ў Беларусі кантролю допуску на рынак арганізацый і спецыялістаў, якія працуюць у будаўнічай сферы. Як вы гэта назавеце - ліцэнзаваннем, атэстацыяй, - вырашайце самі».

«Будаўніцтва пашкоджана іржой карупцыі»

Будаўнічая галіна апынулася пашкоджанай іржой карупцыі, заявіў Лукашэнка.

Паводле яго слоў, карупцыя з'яўляецца адной з вострых праблем будаўнічай галіны. «Не адзінкавымі з'яўляюцца факты, калі службовыя асобы бяруць хабар за спрыяльнае рашэнне пытанняў заключэння дамоваў падраду, падпісання актаў выкананых, а дакладней нявыкананых, работ», - адзначыў Лукашэнка і прывёў некалькі такіх прыкладаў.

Так, былы гендырэктар акцыянернага таварыства «Маналіт Град» сістэматычна атрымліваў хабар ад кіраўніка ТАА «Анліса» за спрыяльнае заключэнне дамовы субпадраду. У цяперашні час ён арыштаваны. У суд накіраваная справа ў дачыненні да дырэктара камунальнага прадпрыемства «УКБ-Кантакт», які спачатку гэтага года атрымаў хабар ад дырэктара ТАА «Белмаркет» за заключэнне дамовы на пастаўку электратэхнічнай прадукцыі. Былы дырэктар УКБ Лоеўскага раёна за хабар падпісаў акты прыёмкі і даведкі кошту нявыкананых работ, з-за чаго падрадчык атрымаў незаробленае. Гэта прычыніла ўрон бюджэту Лоеўскага раёна ў асабліва буйным памеры. Узбуджаная крымінальная справа.

«Прымудраюцца нават спісваць з рахункаў прадпрыемстваў фінансавыя сродкі на ўласныя патрэбы. Так, кіраўнік УКБ Баранавіцкага райвыканкама сістэматычна аплачвала за кошт прадпрыемства свае замежныя адпачынкі ў ААЭ і еўрапейскіх краінах», - працягнуў Лукашэнка.

Паводле яго слоў, хабарніцтва, злоўжыванні службовымі паўнамоцтвамі былі выяўленыя ва ўсіх рэгіёнах краіны. «Абураюць як самі гэтыя з'явы, так і тое, што пакаранне вінаватых і аднаўленне справядлівасці часта позняцца. Чаму гэта стала магчымым? Таму што прынцып «злодзей павінен сядзець у турме» не заўсёды спрацоўваў і спрацоўвае ў поўнай меры», - падкрэсліў Лукашэнка.

Ён запатрабаваў, каб няўхільна выконваўся прынцып: калі ўзяў грошы ў людзей і не пабудаваў дом, павінен адказаць на поўную катушку. «У кола адказных павінны быць уключаныя не толькі непасрэдныя выканаўцы, але і тыя, хто ствараў умовы для крадзяжу. Караць трэба, нягледзячы на асобы, аж да самых высокіх чыноўнікаў», - заявіў ён.