Штрафы за непраходжанне тэхагляду вырастуць у некалькі разоў

Льготы па выплаце падатку на аўто будуць мінімальныя, а штрафы за непраходжанне тэхагляду вырастуць.

Пра гэта заяўляе міністр фінансаў Беларусі Андрэй Харкавец, піша «Інтэрфакс».

«Льготы па выплаце пошліны будуць мінімальныя. Да такіх катэгорый будуць адносіцца транспартныя сродкі інвалідаў, грамадскі транспарт, хуткая дапамога і МНС», - сказаў Харкавец, прадстаўляючы ў чацвер у беларускім «парламенце» праект закона «Аб унясенні змяненняў і дапаўненняў у некаторыя законы Рэспублікі Беларусь па пытаннях прадпрымальніцкай дзейнасці, падаткаабкладання і адміністрацыйнай адказнасці».

Міністр адзначыў, што плацельшчыкамі пошліны будуць усе ўладальнікі аўтамабіляў - як юрыдычныя, так і фізічныя асобы.

Харкавец растлумачыў, што памер дзяржпошліны будзе вылічацца ў базавых велічынях і вар'іравацца ў залежнасці ад класа аўтамабіля. Прадугледжваецца таксама, што грамадзяне самі будуць выплачваць дзяржпошліну да моманту праходжання аўтамабілем тэхагляду.

Пры гэтым міністр адзначыў, што з мэтай прадухілення грамадзянамі наўмыснага ўхілення ад тэхагляду прадугледжваецца ўзмацніць адміністрацыйную адказнасць за такое парушэнне.

«Для скарачэння выпадкаў наўмыснага ўхілення ад тэхагляду прапануецца ўстанавіць штрафы ў памеры ад 2 да 5 базавых велічынь. Зараз адказнасць прадугледжаная ў выглядзе папярэджання або шрафа да 2 базавых велічынь», - растлумачыў Харкавец.

Ён падкрэсліў, што ўвядзенне дзяржпошліны «адпавядае практыцы суседніх краін, пры тым, што там кошт паліва перавышае беларускія кошты».