АМАП учыніў зачыстку ў цэнтры Баранавічаў

Групы моладзі затрымлівалі і адпраўлялі ў ГАУС для высвятлення асобы.

Прычынай зачысткі, якую міліцыя праводзіла на выходных у цэнтры горада, стала інфармацыя аб канфлікце паміж туркменамі і мясцовымі жыхарамі. Яна з'явілася ў сацыяльных сетках 13 снежня. Інфармацыю аб бойцы ў тэлефоннай размове ў рэдакцыю мясцовага выдання Intex-press таксама паведамілі чытачы.

У сацыяльных сетках была таксама аб'ява аб зборы беларускіх падлеткаў у суботу на вуліцы Войкава. Каля пяці гадзін 14 снежня там з'явіліся два аўтазакі і каля дзесятка міліцыянтаў і амапаўцаў. Яны накіраваліся да кучкі хлопцаў, якія ішлі ў бок стадыёна, і папрасілі пашпарты.

«Прашу вас тут сёння не з'яўляцца», - аддае пашпарт аднаму з хлопцаў амапавец і разам са сваімі калегамі ідзе правяраць двары.

Мужчына, які накіроўваўся ў тыя ж двары, спалохана азіраючыся, тармозіць каля самалёта:

«А што тут так шмат амапаўцаў? Нешта здарылася? Чаму ж нас не папярэдзілі? А то ў мяне дзіця ў цэнтры гуляе. Да міліцыянтаў каля аўтазакаў падышоў, а яны толькі ўсміхаюцца, нічога не кажуць».

Міліцыянты ў форме, на пытанне журналістаў, што ж здарылася, палохаюць:

«Вайна пачалася ў чатыры гадзіны. А так больш нічога».

Амапаўцы, якія засталіся адны на апусцелым месцы каля самалёта, кажуць, што ўжо «з тыдзень тут выконваюць сваю працу». Якую працу, не ўдакладняюць.

Трохі растлумачваюць сітуацыю людзі ў цывільным:

«Мы мяркуем, што моладзь ідзе ўчыняць сюды масавыя беспарадкі. Быў дробны канфлікт, можна выказаць здагадку, з туркменамі, і цяпер адзін сваіх кліча, іншы - сваіх. Мы тут, каб гэта не перарасло невядома ў што, не дай Бог... Майдан ладзіць тут не трэба».

Праз некалькі хвілін з радыёперадавальніка аднаго з міліцыянтаў даносяцца адрывістыя фразы, што ў цэнтры збіраюцца групкамі.

Моладзі ў цэнтры горада шмат. Купкамі стаяць на прыступках каля кінатэатра, здзіўлена глядзяць на машыну з АМАПам, якая спынілася прама ў цэнтры, непадалёк ад помніка вераб'ю.

На стаянцы каля гарвыканкама таксама міліцэйскія машыны. У натоўпе пераходзячых вуліцу пешаходаў паставыя выглядваюць групу падлеткаў і адводзяць іх да транспарту. Праз некалькі хвілін бела-сіні аўтамабіль з хлопцамі ўнутры з'язджае ў невядомым кірунку. Машына з АМАПам таксама знікае.

Колькі моладзі было дастаўлена ў ГАУС, невядома. У міліцыі, па словах падлеткаў, некаторых фатаграфавалі, апытвалі, куды яны накіроўваліся, з якой мэтай, і пакідалі чакаць прыезду родных. Праз дзве гадзіны некаторых вызвалілі.