29 сакавiка 2024, Пятніца, 0:19
Падтрымайце
сайт
Сім сім,
Хартыя 97!
Рубрыкі

Украінскі палітолаг: Пуцін пасадзіў Януковіча на ланцуг

37
Украінскі палітолаг: Пуцін пасадзіў Януковіча на ланцуг

Прэзідэнт Украіны паўтарае лёс Лукашэнкі.

Такім чынам палітычны аналітык Інстытута Еўра-Атлантычнага супрацоўніцтва Уладзімір Горбач пракаментаваў сайту charter97.org сустрэчу прэзідэнтаў Украіны і Расеі.

«Учора прэзідэнт Украіны засунуў сваю галаву ў пятлю, якая будзе яго цяпер трымаць на прывязі. Я б нават сказаў, што Пуцін пасадзіў Януковіча на фінансавы ланцуг. Тое, што ўчора адбылося, ставіць украінскае кіраўніцтва ў поўную залежнасць ад волі і жаданняў кіраўніцтва расейскага. Нават без фармальнага ўступлення ў Мытны саюз. Тое, што адбылося, значна горш, чым членства ў МС, паколькі гэта проста фінансавая кабала. Што тычыцца крэдыту, то Расейская Федэрацыя будзе порцыямі вылучаць гэтыя грошы пад выкананне ўкраінскім партнёрамі ўзятых на сябе абавязацельстваў, пра якія мы пакуль не ведаем, але будзем даведвацца паступова. Крэдыт крэдытам, але яго чымсьці трэба аддаваць, а грошай ва Украіны няма. Гаворка ідзе пра 15 мільярдаў даляраў пры тым, што Украіна мае 19 мільярдаў золатавалютнага запасу. Гэта значыць аддаваць няма чым», - падкрэсліў эксперт.

Палітолаг дадаў, што ў наступным годзе трэба аддаваць 7 мільярдаў іншым крэдыторам, і расейскае кіраўніцтва разумела тое, што Украіна не зможа аддаць гэты крэдыт.

«Таму, вядома ж, павінны мець месца нейкія дадатковыя дамоўленасці аб тым, чым Украіна будзе расплачвацца за гэты крэдыт. І будзе яна расплачвацца не толькі палітычнымі абавязальніцтвамі, але, напэўна, і дзяржаўнай маёмасцю. Па газе тое ж самае. Кошт на газ будзе пераглядацца паквартальна, гэта ўжо вядома. І ў пачатку кожнага квартала расейскі бок можа выціскаць з украінскага кіраўніцтва дадатковыя ўмовы. Гаворка можа ісці аб прыватызацыі ўкраінскіх прадпрыемстваў расейскімі кампаніямі. Гэта значыць, у прынцыпе гэтых грошай можа хапіць Януковічу да прэзідэнцкіх выбараў 2015 года, але не больш. А там яго чакае прамая дарога ў Еўразійскі саюз і паўтарэнне лёсу Лукашэнкі, толькі ў вельмі аслабленым выглядзе, паколькі такой улады Януковіч не мае і, хутчэй за ўсё, атрымаць не зможа», - адзначыў аналітык.

Уладзімір Горбач дадаў, што Украіна знаходзіцца ў стане тэхнічнага дэфолту, і ён проста не абвешчаны.

«Але гэта не мае ніякага дачынення да падпісання дамовы аб асацыяцыі з ЕЗ. Гэта стан, да якога давяла Украіну цяперашняя ўлада. І Еўрапейскі звяз, і Міжнародны валютны фонд прапаноўвалі сваю дапамогу, але Януковіч не пайшоў на гэтыя ўмовы, паколькі гэта падрывала б яго асабістую ўладу і азначала б, што ён не змог бы быць выбраным у 2015 годзе паўторна. Ён вырашыў прамяняць фармальнае прэзідэнцтва на поўную залежнасць ад Пуціна. Вось што адбылося. Так што казаць зараз пра дамову аб асацыяцыі ўжо бессэнсоўна. Зараз выдатна зразумела, што гэта быў проста блеф і спроба «развесці» Пуціна на лепшыя ўмовы для гэтага крэдыту. Вось і ўсё. Януковіч ні разу не збіраўся падпісваць пагадненне аб асацыяцыі», - сказаў на заканчэнне эксперт.

Нагадаем, учора ў Маскве прайшла сустрэча Уладзіміра Пуціна і Віктара Януковіча. Яе вынікам стала рашэнне расейскага ўрада аб размяшчэнні часткі свайго Фонду нацыянальнага дабрабыту (ФНБ) ва Украіне ў памеры $15 млрд. Таксама «Газпрам» і «Нафтагаз» падпісалі дапаўненні да кантракту на пастаўкі расейскага паліва на Украіну, у адпаведнасці з якімі кошт газу складзе 268,5 даляра за тысячу кубаметраў.

Пры гэтым Пуцін запэўніў, што не абмяркоўваў з Януковічам далучэнне Украіны да Мытнага Саюза. Рашэнне аб размяшчэнні ў каштоўных паперах Украіны часткі рэзерваў Фонду нацыянальнага дабрабыту, па словах прэзідэнта Расеі, не звязана ні з якімі ўмовамі.

Напісаць каментар 37

Таксама сачыце за акаўнтамі Charter97.org у сацыяльных сетках